بيىلعى ۇلتتىق بىرىڭعاي تەستىلەۋدىڭ ورتاشا بالى ەلوردانىڭ بىلىم سالاسى ۇشىن كوڭىل كونشىتەرلىكتەي. قورىتىندىعا سايكەس استانانىڭ ءۇش مەكتەبى رەسپۋبليكامىزداعى ۇزدىك مامانداندىرىلعان مەكتەپتەر وندىعىنا ەنگەن.
«دارىن» مامانداندىرىلعان ليتسەيىندە ۇبت-نىڭ ورتاشا بالى 113-ءتى, دارىندى بالالارعا ارنالعان № 9 «زەردە» مەكتەبىنىڭ ورتاشا كورسەتكىشى 111,98 بالدى جانە دارىندى قىزدارعا ارنالعان قازاق-تۇرىك ليتسەيىندە 111,63 بالدى قۇراپ, اتالعان مەكتەپتەر كوش باسىنا شىقتى. بىلتىرعى ۇلتتىق بىرىڭعاي تەستىلەۋدىڭ قورىتىندىسىندا دارىندى بالالارعا ارنالعان №9 «زەردە» مەكتەبى ۇزدىك مامانداندىرىلعاندار تىزىمىنە ەنبەي قالعان ەدى. بيىل مەجەلى بيىكتەن كورىنىپ وتىر.
جالپى, ەلىمىزدەگى دارىندى بالالارعا ارنالعان 124 مەكتەپ بولسا, سونىڭ بەسەۋى ەلوردادا ورنالاسقان. ونىڭ قاتارىندا دارىندى بالالارعا ارنالعان قازاق-تۇرىك ليتسەيى مەن № 81 «Astana English School» گيمنازياسى بار.
