ەلوردا جولدارىنىڭ قۇرىلىسىندا نەگىزگى ەكپىن قالانىڭ شەتكى ايماقتارىنىڭ جوندەلۋىنە بەرىلگەن. بيۋدجەتتەن بولىنگەن قارجىنىڭ جارتىسىنان كوبى وسى جۇمىسقا جانە شاھاردىڭ كۇرەتامىر, قوعامدىق كولىك كوپ جۇرەتىن, حالىق كوپ تۇراتىن اۋماقتارداعى جولداردىڭ جوندەلۋىنە ءبولىندى. بۇل تۋرالى كەشە قالالىق ءماسليحاتتىڭ كەزەكتەن تىس سەسسياسىندا قالا اكىمى التاي كولگىنوۆ ايتتى.
– جاقىندا جاڭا كوپىردى اشتىق. ول حالىقتىڭ يگىلىگىنە جۇمىس ىستەپ تۇر. قازىر ماڭگىلىك ەل داڭعىلىندا جول جوندەلىپ جاتىر. بىزدە ءبارى سول جاعالاۋدا جاسالىپ جاتىر دەگەن ستەرەوتيپ بار. بۇل دۇرىس ەمەس, «وڭتۇستىك-شىعىس» تۇرعىن الابىندا, «كوكتالدا», «اگروقالاشىقتا», «ينتەرناتسيونالنىيدا», «ۇركەردە», بارلىق جەردە جولداردى جاساپ جاتىرمىز. جىل سايىن جوسپارعا سايكەس قالانىڭ باسقا دا شەتكى اۋداندارىندا, ەلدى مەكەندەردە جولداردى جوندەيمىز. جەڭىس, بوگەنباي باتىر داڭعىلدارىندا, بەيبىتشىلىك كوشەسىندە, قاراساي باتىردا, باسقا دا كوشەلەردە جوندەۋ جۇرگىزدىك. قالانىڭ بارلىق اۋدانىنا تەڭ, بىردەي قارايمىز. بيىل قىركۇيەككە دەيىن نەگىزگى كۇرەتامىر جولداردىڭ ءبارىن جوندەپ, بالالار مەكتەپكە بارعانشا كەپتەلىستى ازايتۋ ءۇشىن جۇمىس ىستەپ جاتىرمىز, – دەدى التاي كولگىنوۆ.
قالا كوشەلەرىندە جوندەۋ جۇمىستارى جالعاسۋدا. نۇر-سۇلتان قالاسىنىڭ كولىك جانە جول-كولىك ينفراقۇرىلىمىن دامىتۋ باسقارماسىنىڭ بيىلعى جوسپارىنا سايكەس, 68 شاقىرىمعا سوزىلاتىن 131 كوشەنى جوندەۋ جۇمىسى قارقىندى ءجۇرىپ جاتىر.
ونىڭ ىشىندە ۇزىندىعى 38,6 شاقىرىمدى قۇرايتىن 53 ۋچاسكەدە كوشەلەردى ورتاشا جوندەۋ جۇمىسى اياقتالدى. بيىل بەس جول نىسانىنىڭ قۇرىلىسىن اياقتاۋ جوسپارلانۋدا. ورتالىق كوشەلەردى جوندەۋمەن قاتار تۇرعىن ءۇي الاپتارىنداعى جولداردى اسفالتتاۋ جۇمىسى قاتار اتقارىلۋدا.
