استانالىقتار بايداركامەن جانە كانوەمەن ەسۋ سپورتىنا اسقان قىزىعۋشىلىق تانىتۋدا. بۇگىندە جۇزگە جۋىق جاس سپورتشى №4 بالالار جاسوسپىرىمدەر سپورت مەكتەبىندە ءبىلىم الىپ ءجۇر. ەسكەك ەسۋشىلەر جوعارى ناتيجەلەرگە قول جەتكىزىپ, قۇراما كوماندا دەڭگەيىندە ونەر كورسەتكەندە استانا قالاسىنىڭ مامانداندىرىلعان جوعارى سپورت شەبەرلىگى مەكتەبىنە اۋىسادى.
اتالعان سپورت ءتۇرى ەلوردادا 2000 جىلدان بەرى دامىپ كەلەدى. توپقا ون جاستان اسقان بالالار قابىلدانادى. بۇل سپورتقا ۇلدار دا, قىزدار دا اۋەس. قايىقتا وتىرىپ ۇيرەنۋدىڭ وزىنە 2-3 اپتاداي ۋاقىت كەتەدى.
– كىشكەنتاي بالالار كەلىپ وقيدى. قايىقپەن ءجۇزىپ ۇيرەنۋ قيىن. بۇل جەردە تەپە-تەڭدىكتى ساقتاي ءبىلۋ كەرەك. كانوەمەن دە, بايداركامەن دە. وسىنى ۇيرەنگەن سوڭ بالالار العاشقى جارىستارعا دايىندالادى, – دەدى №4 بجسم بايداركامەن جانە كانوەمەن ەسكەك ەسۋدەن جاتتىقتىرۋشى-وقىتۋشى ەۆگەني بەجنار.
جازعى دەمالىس ۋاقىتىندا جاتتىعۋلار اپتاسىنا 8-10 رەت وتەدى. ال بالالار مەكتەپكە بارعاندا – 5–6 رەت. ونىڭ ۇستىنە ءتوزىمدى بولۋ ءۇشىن كوپ ەڭبەكتەنۋ كەرەك. قىستا سپورتشىلار شاڭعى تەبەدى, ترەناجەر زالدارىندا جاتتىعادى, جۇگىرەدى.
ون جەتى جاسار الەكساندرا كيم بۇل سپورتقا كەلەم دەپ ويلاماعان, بۇگىندە ول – سپورت شەبەرى. ءۇش جىل بويى بايداركامەن جۇزسە, ەندى كانوەگە اۋىستى.
– بۇل سپورتقا قۇربىممەن كەلدىم. دەنساۋلىعىمدى شىنىقتىرۋ ءۇشىن عانا اينالىسام دەپ ويلادىم. ناتيجەسىندە, كاسىبي اينالىسا باستادىم. جاقىندا سلوۆاكياداعى حالىقارالىق جارىسقا بارىپ كەلدىك. فرانتسيادا وتكەن Women’s canoe cup دوداسىنا دا قاتىستىق. قازىر برەستتە وتەتىن جيىنعا دايىندالىپ جاتىرمىز, سودان كەيىن جوسپار بويىنشا مينسكتە 1998 جىلى تۋعان جانە ودان كىشى بالالار اراسىنداعى الەم بىرىنشىلىگى وتەدى. وسى سپورت تۇرىمەن اينالىسقاننان كەيىن ءوز-وزىڭە دەگەن سەنىمىڭ, كۇشىڭ ارتادى. بۇل ءۇشىن كوپ ەڭبەك ەتۋ كەرەك. ايەلدەر وليمپيادادا كانوەمەن 200 مەتر قاشىقتىقتى باعىندىرادى, مەن وسى ماقساتتى كوزدەپ ءجۇرمىن, ارمانىم – وليمپياداعا قاتىسۋ, – دەيدى سپورتشى.
سپورتشىلار 23 جاسقا دەيىن №4 بجسم بازاسىندا جاتتىعادى. ۇزدىك ناتيجەلەر كورسەتكەن بالالار مامانداندىرىلعان جوعارى سپورت شەبەرلىگى مەكتەبىندە شەبەرلىگىن شىڭدايدى.
مۇندا سپورتشىلارمەن پسيحولوگ, ديەتولوگ, ماسساجيست, جانە باسقا دا ماماندار جۇمىس ىستەيدى. مىسالى, ءار سپورتشىنىڭ راتسيونى بولەك, ورتاشا سالماعى 85-95 كگ بولۋى كەرەك.
توپ بەس ادامنان تۇرادى. سونىڭ ىشىندە ۇشەۋى سەرگەي توكارنيتسكي, زويا انانچەنكو, يننا كلينوۆا وليمپيادا ويىندارىنا دايىندىق ۇستىندە.
– ولار قازىر بەلارۋستە, برەستتە, جەرگىلىكتى كوماندامەن بىرگە دايىندالۋدا. سپورتشىلار 24 شىلدەدە چەحياعا بارادى, وندا ەكى اپتا بولادى, سودان كەيىن ريو-دە-جانەيروعا ۇشادى, – دەدى استانا قالاسىنىڭ مامانداندىرىلعان جوعارى سپورت شەبەرلىگى مەكتەبىنىڭ اعا باپكەرى اسحات قالياقپاروۆ.
ەسكە سالايىق, ءتورت جىلدىقتاعى باستى جارىستىڭ اشىلۋىنا دەيىن ءبىر ايدان از ۋاقىت قالدى. وليمپيادا تامىزدىڭ 5-ءى مەن 21-ءى ارالىعىندا ريو-دە-جانەيرودا وتەدى.
astana.gov.kz
