بۇگىن ەلوردا اكىمى اسەت يسەكەشەۆ ەسكى جانە اپاتتى جاعدايداعى تۇرعىن ۇيلەردى بۇزۋ بويىنشا پيلوتتىق جوبانىڭ ورىندالۋ بارىسىمەن تانىستى. قالا باسشىسى جاڭا تۇرعىن ۇيلەردىڭ قۇرىلىسىنا بولىنگەن جەر ۋچاسكەلەرىن ارالادى, ەسكى جانە اپاتتى جاعدايداعى ۇيلەردىڭ تۇرعىندارى جىل سوڭىنا دەيىن باسپانالى بولادى.
قالانىڭ ءبىر بولىگىن قالپىنا كەلتىرۋدىڭ پيلوتتىق جوباسىمەن تۇرعىن ۇيلەر سالۋ, اپاتتى جاعدايداعى ۇيلەردى بۇزۋ جانە قالاداعى «ەسكى ورامداردى» قالپىنا كەلتىرۋ قاراستىرىلعان. وسىلايشا, ەلوردا تۇرعىندارى اقىسىز نەگىزدە جاڭا پاتەرلەرگە (اۋدانى ەسكى ءۇيدىڭ اۋدانىمەن بىردەي) يە بولادى, قالا اباتتاندىرىلىپ جاتىر, بۇل رەتتە ينۆەستيتسيالار قاراجاتتىڭ قايتارىمدىلىعى قاعيداتىمەن جەكە ينۆەستوردان تارتىلاتىندىقتان جاڭا تۇرعىن ءۇيدىڭ قۇرىلىسىنا بيۋدجەت قارجىسى جۇمسالمايدى.
«جوبا جاقسى. ەندى نىسانداردى تاپسىرۋدى سوزباي, بارلىق مەرزىمدەر مەن كەستەلەردى ساقتاۋ كەرەك. كوشىپ كەلەتىن وتباسىلار ءۇشىن ينفراقۇرىلىمنىڭ بولۋىن قاراستىرۋ قاجەت, پايدالانۋعا بەرىلەتىن باسپانالاردا مىندەتتى تۇردە بالاباقشالار مەن سپورت الاڭدارى بولۋى ءتيىس» – دەدى اسەت يسەكەشەۆ.
جوبانىڭ ءبىرىنشى كەزەڭىندە ءۇش جىلدىڭ ىشىندە 13 تۇرعىن ءۇي كەشەنىندە جالپى اۋدانى 234 مىڭ شارشى م. 28 تۇرعىن ءۇي تاپسىرىلدى. اتالعان جوبا اياسىندا ەسكى جانە اپاتتى جاعدايداعى 1476 تۇرعىن ۇيدە تۇرىپ جاتقان وتباسىلار جاڭا باسپاناعا يە بولدى.
جوبا جۇزەگە اسىرىلعان جىلدارى استانادا 90 ەسكى ءۇي بۇزىلدى, جىل سوڭىنا دەيىن تاعى دا 27 ءۇي بۇزىلادى. بيىل 601 وتباسى باسپانالى بولادى. 2017 جىلى 111 بۇزىلعان ەسكى ۇيدە تۇرعان 1872 وتباسى اقىسىز نەگىزدە جاڭا پاتەرلەرگە يە بولادى.
«قولجەتىمدى تۇرعىن ءۇي – 2020» باعدارلاماسى اياسىندا قولعا الىنعان جوبانى جۇزەگە اسىرماس بۇرىن 2013 جىلى قالانىڭ تۇرعىن ءۇي قورىنا تالداۋ جۇرگىزىلىپ, ۆەدومستۆوارالىق كوميسسيامەن تۇرعىن عيماراتتار مەن قۇرىلىستاردى اپاتتى جاعدايدا جانە بۇزۋعا جاتادى دەپ تانىلعان نەگىزگى قۇرىلىس كونسترۋكتسيالارى مەن ينجەنەرلىك جەلىلەرى ابدەن توزعان تۇرعىن ۇيلەردىڭ ءتىزىمى جاسالدى. تىزىمگە 1940-1970 جج سالىنعان 228 باسپانا ەندى, ولار 2018 جىلعا دەيىن ىسكە اسىرىلاتىن جوبانىڭ ءبىرىنشى كەزەڭىندە ۇلەستىرىلەدى. ەسكى جانە اپاتتى جاعدايداعى تۇرعىن ۇيلەردى بۇزۋ بويىنشا جوبانىڭ ەكىنشى كەزەڭى 2018-2020 جج. جۇزەگە اسىرىلادى. قازىرگى كەزدە تۇرعىن ۇيلەردىڭ ءتىزىمى جاسالىپ, 11 جوبا ازىرلەنىپ, جەتەۋى دايىندىق ۇستىندە. جوبالانىپ جاتقان تۇرعىن ۇيلەردىڭ جالپى اۋدانى – 366,5 مىڭ شارشى م.
astana.gov.kz
