ەلوردادا جەل ەلەكتر ستانساسى سالىنادى. قازىرگى ۋاقىتتا تەحنيكالىق-ەكونوميكالىق نەگىزدەمەسى ازىرلەنىپ جاتىر. بۇل تۋرالى قالا اكىمى التاي كولگىنوۆ ءمالىم ەتتى.
– ەلوردادا شەتەلدىك جەكە قاراجات ەسەبىنەن جەل ەلەكتر ستانتسياسىن (جەس) سالۋدى جوسپارلاپ وتىرمىز. بۇل ماسەلەنى يتاليانىڭ ENI مۇناي-گاز كومپانياسىمەن («Arm Wind» جشس), قر ەنەرگەتيكا مينيسترلىگى وكىلدەرىمەن بىرلەسە پىسىقتاپ جاتىرمىز. جەل ەلەكتر ستانتسياسىنىڭ قۋاتى ءبىرىنشى كەزەڭدە 50 مۆت بولادى, ال ودان ءارى 100 مۆت-قا دەيىن ۇلعايتۋعا مۇمكىندىگى بار. جاڭارتىلاتىن ەنەرگيا كوزدەرى سالاسىنداعى بۇل جوبا ەلەكتر ەنەرگياسىنىڭ قوسىمشا ماڭىزدى كولەمىن قۇرۋعا مۇمكىندىك بەرەدى. وسى ارقىلى قۇرىلىسى ءجۇرىپ جاتقان بولاشاق اۋدانداردى ەلەكتر ەنەرگياسىمەن قامتاماسىز ەتەدى. وسى ماقساتتا تارتىلاتىن شەتەلدىك جەكە ينۆەستيتسيالار سوماسى 50 ملرد تەڭگەگە جۋىقتايدى. قازىرگى ۋاقىتتا تەحنيكالىق-ەكونوميكالىق نەگىزدەمەسى ازىرلەنىپ جاتىر. مەملەكەت باسشىسى جاڭارتىلاتىن ەنەرگيا كوزدەرى سەكتورىن كەڭەيتۋدىڭ جانە ەلىمىزدىڭ ەلەكتر ەنەرگەتيكاسى سالاسىن دامىتۋدىڭ ەرەكشە ماڭىزدىلىعىنا توقتالىپ ءوتتى. سەبەبى قازىر ەنەرگەتيكا ەل ەكونوميكاسىندا نەگىزگى ءرول اتقارادى. پرەزيدەنت ەلىمىزدەگى «جاسىل» تەحنولوگيالاردىڭ ۇلەسى 2030 جىلعا قاراي 15%-عا دەيىن ارتۋى ءتيىس ەكەنىن اتاپ ءوتتى, – دەدى التاي كولگىنوۆ.
