Үкімет басшысы Асқар Маминнің төрағалығымен Нұр-Сұлтан қаласы жаңа орталығының құрылысын бақылау жөніндегі мемлекеттік комиссияның отырысы өтті.
2019-2023 жылдарға арналған Нұр-Сұлтан қаласы құрылысының кешенді жоспарын жүзеге асыру туралы қала әкімі А.Көлгінов, тұрғын үй салу, инженерлік және жол-көлік инфрақұрылымын дамыту туралы Индустрия және инфрақұрылымдық даму министрі Б.Атамқұлов, елорданы газдандыру туралы Энергетика министрі Н.Ноғаев, мектептер салу туралы Білім және ғылым министрі А.Аймағамбетов, халықты сумен қамтамасыз ету жағдайы туралы Экология, геология және табиғи ресурстар министрі М.Мырзағалиев, сондай-ақ орталық мемлекеттік органдардың басқа да басшылары бейінді жұмыс бағыттары туралы баяндады.
Биыл Нұр-Сұлтан қаласында шамамен 3 млн шаршы метр тұрғын үй, соның ішінде 8 мың қолжетімді пәтер пайдалануға беріледі. Тұрғын үй алаптарының инженерлік-коммуникациялық инфрақұрылымын дамыту жұмыстары жүргізіліп жатыр. Үлескерлер мәселесін шешу аясында биыл 20 нысанның құрылысы аяқталады (2019 жылы – 10). Желтоқсан айының басында 7 жылдық тарихы бар «Гарант» тұрғын үй кешені пайдалануға берілді. Қалған 22 проблемалық нысанды 2021-2023 жылдар аралығында пайдалануға беру көзделген.
Биыл елордада 150 аула және 60 қоғамдық кеңістік (760 мың шаршы метр) абаттандырылды, 106 мың жасыл желек отырғызылды. №1 жылу-электр орталығы және №2 жылу-электр орталығы ішінара газға ауыстырылды. «Көктал» тұрғын алабына апаратын газ құбырының құрылысы аяқталды. «Железнодорожный» тұрғын алабында 100 пайыз тарату желілері салынды. «Агроқалашықтың» бір бөлігі, «Көктал-1», «Көктал-2» тұрғын үй алаптары аяқталу сатысында тұр, «Күйгенжар», «Мичурино», «Интернациональный» тұрғын үй алаптарын газдандыру жұмыстары жүргізілуде. Жалпы алғанда, елорданың тұрғын үй алаптарында 300 км-ге жуық газ құбыры салынды, 5 мыңнан астам үй газбен жабдықтау жүйесімен қамтамасыз етілді.
Ағымдағы жылы елордада 12 мектептің құрылысы аяқталды, бұл өткен жылдың көрсеткішінен 2 есеге көп. 2021 жылы қосымша 15 мектеп салып, пайдалануға беру жоспарда бар. Отырысқа қатысушылар тұрғын үйдің қолжетімділігін одан әрі арттыру, әлеуметтік нысандар құрылысы, тіршілікті қамтамасыз ету және көлік инфрақұрылымын дамыту, әлеуметтік маңызы бар азық-түлік өнімдерінің бағасын ұстап тұру тәрізді жүйелі мәселелерді қарастырды. Премьер-министр қаланың қысқа мерзімді және ұзақ мерзімді дамуына қатысты барлық мәселелер бес жылдық кезеңге арналған елорданың ықшам құрылысы жөніндегі кешенді жоспармен үйлестірілуі тиіс екенін атап өтті.
«Қазақстанның Тұңғыш Президенті – Елбасы Нұрсұлтан Әбішұлы Назарбаев пен Мемлекет басшысы Қасым-Жомарт Кемелұлы Тоқаев елорданы дамытуға ерекше көңіл бөледі. Нұр-Сұлтан қаласы құрылысының кешенді жоспарының іс-шараларын сапалы әрі уақытылы орындау үшін барлық шараларды қабылдау қажет» деді А.Мамин. Үкімет басшысы елорданы дамытуға инвестициялар тарту бойынша жұмысты жандандыру қажеттігіне, тұрғын үй, әлеуметтік-мәдени және көлік инфрақұрылымы құрылысының жоспарланған көлемін қамтамасыз етуге, сондай-ақ қаланы сумен қамтамасыз ету және абаттандыру проблемаларын шешу қажеттігіне назар аударды.
