БІРЛЕСІП АТҚАРҒАН ІС БЕРЕКЕЛІ
Астана қаласы әкімдігінің жанындағы үкіметтік емес ұйымдармен ынтымақтастық және өзара әрекет жөніндегі консультациялық кеңестің отырысы өтті.
Астана қаласы Ішкі саясат басқармасының бастығы Болат Тілеповтің айтуынша, бүгінгі таңда Астанада ресми түрде 280 үкіметтік емес ұйым тіркелген. Олардың жыл басынан бері атқарған шаруаларын қорытындылай келе, басқарма бастығы қазіргі кезде жалпы құны 38 млн теңгені құрайтын 19 әлеуметтік жобаның жүзеге асырылғанын айтты.
Күн тәртібіндегі мәселе бойынша қалалық мәдениет басқармасы бастығының орынбасары Самат Тергембаев сөз сөйлеп, мемлекеттік органдар мен үкіметтік емес ұйымдардың, этномәдени бірлестіктердің бас шаһардағы мәдени-көпшілік шараларды ұйымдастырып, өткізудегі ынтымақтастығы туралы әңгімеледі.
Бұл ретте Астанада ауқымды істер атқарылуда.
Үкіметтік емес ұйымдар қалада ұйымдастырылатын шараларға белсене атсалысуда. Тек осындай іс-шараларды өткізуге алдымен қаражат қажет екені белгілі. Бұл бағытта әлеуметтік салаға дербес бөлінген қаржының жоқтығына қарамастан, ұйымдастырушылық жағынан барынша көмек көрсетіп келе жатқандарын жеткізген басқарма бастығының орынбасары алдағы уақытта да дәл осындай белсенділік танытып, үкіметтік емес ұйымдарды ынтымақтаса еңбек етуге шақырды.
Бірлесіп атқарылған іс қашан да нәтижелі болады. Сондықтан, баршамызға ортақ істе ұйымшылдық танытып, бірлесе еңбек етудің береке әкелетінін естен шығармаған игі.
Отырысқа қатысқандар осындай оймен тарқасты.
Гүлбаршын ӨКЕШҚЫЗЫ