Астанада ҚР Мемлекеттік қызмет істері министрі Талғат Донақовтың төрағалығымен бірінші жарты жылдықтың қорытындыларына арналған кеңейтілген алқа мәжілісі өтті.
Алқа мәжілісінде алдымен Елбасы Нұрсұлтан Назарбаев жариялаған Ұлт жоспарындағы бірінші институционалдық реформаны жүзеге асыру жөніндегі жұмыс қорытындылары пысықталды.
Елбасының кәсіби мемлекеттік аппарат құруға байланысты жүктеген тапсырмаларына сәйкес, биылғы жылдың басынан бастап мемлекеттік қызмет саласы қайта жаңарып, жаңа заң қабылданғаны белгілі. Бұл өзгерістер экономикалық реформаларды сапалы іске асырып қана қоймай, сыбайлас жемқорлықпен күрес шараларын күшейтуге де ықпал етуде.
Атап айтқанда, биыл елімізде мемлекеттік қызметтің конкурстық іріктеуге негізделген мансаптық моделі енгізілген болатын. Тек қана мемлекеттік қызметшілердің арасында өткізілетін ішкі конкурстар институты енгізілгелі бері лауазымдарға тағайындалған қызметшілердің саны өткен жылмен салыстырғанда 16,4 %-ға өскен. Ал, мемлекеттік қызметшілердің түрлі мекемелер арасында алмасуы екі есеге төмендеген.
Мемлекеттік қызмет істері вице-министрі Нұрлан Ыбырайымның айтуынша, министрлік пен аумақтық департаменттер мемлекеттік қызмет көрсету сапасын арттыру бойынша жұмыстар атқарып келеді. Қабылданған шаралардың нәтижесінде бұл жұмыстың тиімділігі артты. Мәселен, мемлекеттік қызметтерді көрсету мерзімдерін бұзу 4 есеге төмендеген.
Сонымен қатар министрліктің бақылау уәкілеттілігін жүзеге асыру шеңберінде Мемлекеттік қызмет заңнамасын сақтау саласында 351 тексеріс жүргізіліп, 345 заң бұзушылық анықталған. Тексеру нәтижелерінде 114 азаматтың құқы қорғалған.
Бұған қоса, мемлекеттік қызметшілердің құқықтарын қалпына келтіру бойынша шаралар қабылданған. Мәселен, мемлекеттік мекемелерге заңға кереғар қабылданған шешімдердің күшін жою үшін 138 ұсыныс енгізілсе, 39 бұйрықтың күші жойылған.
Тәртіптік жазаға тартылған қызметшілердің де саны азайып отыр. Былтыр алғашқы жартыжылдықта 163 қызметші тәртіптік жазаға тартылса, биыл Әдеп кодексінің нормаларын бұзған қызметшілердің саны – 115.
Жиында мемлекеттік қызметшілердің кәсіби біліктілігін арттыру тәжірибесіне де көп көңіл бөлінгені айтылды. Мәселен, жыл басынан бері 8000-нан астам адам қайта даярлау мен біліктілігін арттыру курстарынан өткен. Жалпы, биыл 20 мыңға жуық қызметшіні оқыту көзделуде.
Мемлекет басшысының Ұлт жоспарындағы 100 нақты қадамның алғашқы бөлімі мемлекеттік аппараты кәсібилендіру қажеттігіне назар аудартады. Ендеше, осы қадамды орындау мақсатында атқарылған құқықтық стандартқа негізделген мемлекеттік қызмет, кәсіби мемлекеттік аппарат құруды көздейді.
Гүлмира ШАРХАНҚЫЗЫ
