Кімдер сенатор болды?
Кеше Орталық сайлау комиссиясы Сенат сайлауының алдын-ала қорытындыларын жариялады. Сөйтіп еліміздің 17 өңірінен сайланатын депутаттардың аты-жөні белгілі болды. Сайлаудың соңғы нәтижесі 18 тамызда жарияланады.
Сенат депутаттары жаңа сайлау құқығы негізінде таңдалды. Оған сәйкес, үміткерлерге облыстық, аудандық және қалалық мәслихат депутаттары дауыс береді. Дауыс беретін барлық 3 071 мәслихат депутаттарының 2 892-сі тіркеліп, Сенат депутаттарын сайлады. Сенат сайлауына 46 үміткер қатысты. Олардың ішінен тек 17 адам ғана жоғары палатаға өте алады. Кешегі сайлауда 185 бақылаушы болды. Олардың ішінде 180 адам қазақстандық бақылаушылар болса, Түркі тілдес мемлекеттерінің ынтымақтастығы кеңесінің миссиясынан бес бақылаушы келді.
Орталық сайлау комиссиясы алдын-ала мәліметіне сәйкес, Сенат сайлауында төмендегі үміткерлер жеңіске жетті: Ақмола облысынан – Ақмола облысы бойынша ревизиялық комиссияның төрағасы Нұрлан Бекенов – 89.5%; Ақтөбе облысынан – Шалқар ауданының әкімі Бауыржан Қаниев – 89%; Атырау облысынан – «Казахстан Петрокемикал Индастриз Инк.» ЖШС басқарушы директоры (KPI Inc) Сағындық Лұқпанов – 82.69%; Батыс Қазақстан облысынан – Іскер әйелдер қауымдастығының аймақтық басшысы Ләззат Рысбекова – 70.33%; Жамбыл облысынан – Жамбыл облысы әкімінің бірінші орынбасары Бекболат Орынбеков – 92.09%; Қостанай облысынан – Қостанай облысы әкімінің орынбасары Сергей Карплюк – 87.21%; Қызылорда облысынан – Nur Otan партиясының Қызылорда облыстық филиалы төрағасының бірінші орынбасары Ақмарал Әлназарова – 77.86%; Маңғыстау облысынан – «Қаражанбасмұнай» АҚ бірінші вице-президенті Сүйіндік Алдашев – 87%; Павлодар облысынан – Павлодар мемлекеттік педагогикалық университетінің ректоры Алтынбек Нухұлы – 81.97%; Солтүстік Қазақстан облысынан – қазіргі сенатор Ольга Перепечина – 87.57%; Түркістан облысынан – қазіргі сенатор Әли Бектаев – 91.53%; Шығыс Қазақстан облысынан – Бородулиха ауданының әкімі Ольга Булавкина – 93.07%; Алматы облысынан – Алматы облыстық мәслихатының хатшысы Сұлтан Дюсембинов – 92.63%; Қарағанды облысынан – қазіргі сенатор Сергей Ершов – 83.15%; Нұр-Сұлтаннан – Сәкен Сейфуллин атындағы Қазақ агротехникалық университетінің ректоры Ақылбек Күрішбаев – 75%; Алматыдан – Медеу ауданының әкімі Сұлтанбек Мәкежанов – 100%; Шымкенттен қазіргі сенатор Айгүл Қапбарова 72% дауыс жинады.