Elordada är türlı jastaǧy şahmatşylar halyqaralyq jarysta şeberlık baiqasuda. «H. S. Omarov memorialy – 2016» jarysy 19 şıldege deiın jalǧasady.
Jalpy, qatysuşylar sany – 200 adam, sonyŋ ışınde 70-sı – eresek. Aşyq turnirge türlı memleketterden kelgen grossmeisterler de qatysuda. Balalar ekı sanat boiynşa saiysqa tüsedı – 6-dan 10 jasqa deiın jäne 10-nan 14 jasqa deiın. Jarysta 100 juyq sportşy Astananyŋ namysyn qorǧaidy.
– Bügıngı jarys – 19-şy «Häkım Omarov atyndaǧy memorial», ol tırı kezınde şahmatty nasihattauǧa jäne onyŋ damuyna zor üles qosqan. Turnirge qatysuǧa balalardyŋ köp kelgenın baiqadym. Olar üşın eŋ bastysy, grossmeisterlerdıŋ nemese şeberlerdıŋ oiynyn köru, būl – bolaşaqta kem degende sondai jetıstıkke qol jetkızuge yntalandyru bolady, bälkım olardyŋ bırı älem chempiony atanatyn şyǧar, – deidı Qazaqstannyŋ şahmat federasiiasynyŋ bırınşı vise-prezidentı Erkın İsraiylov.
Jarys bastalǧannan keiın ūl-qyzdar zeiının oiynǧa şoǧyrlady. Qarsylastar bır-bırıne laiyq ekendıgı baiqalady.
– Şahmatty ūnatamyn, ekı jyl oinap, ekınşı razriad aldym. Endıgı maqsatym bırınşı razriad, odan ärı jeŋıske jetu. Şydamdylyq kerek, türlı taktikalardy, jattyqtyruşynyŋ üiretkenınıŋ bärın bılu kerek, partiialardy este saqtasaŋ boldy, – deidı jas şahmatşy Asanälı Äşımov.
Qatysuşylardy qoldau üşın halyqaralyq grossmeister Dinara Säduaqasova da keldı, ol da osy H. Omarov atyndaǧy klubtan bastaǧan bolatyn. Bügınde ol – käsıpqoi şahmatşy.
– Özım de būǧan deiın «H. Omarov atyndaǧy memorialǧa» talai ret qatysqanmyn, jarysqa qatysatyn balalardyŋ jyl saiyn artyp jatqany quantarlyq jait. Qazaqstanda şahmat damyp keledı, būǧan özım de üles qosqanyma quanyştymyn, – dedı ol.
