«Astana Operanyŋ» solisı Baqtiiar Adamjan Türkiiadaǧy konkursta jeŋıske jettı
Talantty jas Resei, Australiia, Braziliia, Bolgariia, Japoniia, Kanada, Oŋtüstık Afrika, Oŋtüstık Koreia önerpazdarynan dara şyǧyp, Balet ärtısterınıŋ V halyqaralyq konkursynda bas jüldenı qanjyǧasyna bailady.
Türkiianyŋ Siurei opera teatrynda ötken baiqau – bi önerınde airyqşa bedelge ie. Üş kezeŋge bölıngen konkursqa 15-26 jas aralyǧyndaǧy bişıler qatysty.
Baqtiiar Adamjan türık sahnasynda L.Minkustyŋ «Don Kihot», «Baiaderka», B.Asafevtıŋ «Parij jalyny», S.Punidıŋ «Esmeralda» baletınen variasiialar oryndady. Dübırlı doda klassikalyq şyǧarmalardan bölek ekı zamanaui nömırdı qamtydy. Baiqaudyŋ būl baǧdarlamasynda Baqtiiar Uälitbek Siiazbekovtıŋ «Menıŋ bölşegım» jäne belgılı qytailyq horeograf İsian Chjannyŋ «Oianuyn» körsettı.
– Konkurs jaily bır-ekı ai būryn estısek te, daiyndyqty 7-8 kün qalǧanda bastadyq. Öitkenı, bar küşımız ben uaqytymyzdy «Parij Qūdai-ana sobory» baletınıŋ premerasyn ötkızuge arnadyq. Bız üşın premera qaşan da bırınşı orynda, jarystyŋ bärı – ekınşı kezektegı dünie. Dese de, «Astana Operadaǧy» tynymsyz daiyndyqtardyŋ arqasynda baiqau kezınde boiymda alaŋdau, qobalju sezımı bolmady. Öitkenı denem konkurstyq jüktemenı köteruge daiyn edı. Al, jüikeme salmaq tüsırmeu üşın sahnaǧa ozamyn dep emes, körermendı quantamyn dep şyqtym, – deidı jeŋımpaz.
Oryndauşylardyŋ şeberlıgın Berlin Memlekettık baletınıŋ körkemdık jetekşısı, «Tokio-balettıŋ» şyǧarmaşylyq jönındegı keŋesşısı Vladimir Malahov bastaǧan qazylar alqasy baǧalady. Olardyŋ qatarynda balet ärtısterınıŋ R.Nureev atyndaǧy halyqaralyq konkurs direktory R.Bokor, Skope (Makedoniia) Bi teatry jäne bi festivalınıŋ direktory R.Risimkin, «Dance for You» jurnalynyŋ redaktory M.Vieru, Qazaqstannyŋ Halyq ärtısı G.Tūtqybaeva, Boston baletınıŋ körkemdık jetekşısı M.Nissinen, Gollandiia bi festivalınıŋ körkemdık jetekşısı, Rotterdamdaǧy Öner universitetınıŋ «Kodarts» bi akademiiasynyŋ atqaru keŋesınıŋ müşesı S.Viursten sekıldı balet maitalmandary boldy.
– Baqtiiardyŋ bar qabıletın paş etuge küş saldyq. Onyŋ fizikalyq mümkındıgı keŋ, muzykamen keremet üilesımdı. Mınsız sekıredı. Akterlık oiyny qoşemetke laiyq. Baiqauǧa qandai baǧdarlama ūsynatynymyzdy köp oiladyq. Bır jaǧynan uaqyt ta tyǧyz. Däl sol kezde «Astana balet» teatrynyŋ şaqyrtuymen elordaǧa Qytaidan belgılı horeograf İsian Chjan kelgen edı. Ataqty baletmeister Luidjo Bonino onyŋ özı de keremet bileitının aitty. Söitıp İsian Chjandy Baqtiiarǧa zamanaui bi qoiyp beruın qolqaladym. Bırden kelıstı, – dedı «Astana Opera» balettık truppasynyŋ körkemdık jetekşısı, Reseidıŋ halyq ärtısı Altynai Asylmūratova.
Sanauly künde Baqtiiarǧa jaŋa bi üiretken İsian Chjan ärtıstıŋ fizikalyq küiıne joǧary baǧa berıp, bolaşaǧynyŋ zor ekenıne senımın bıldıredı. «Solist tamaşa formada, bärın lezde qaǧyp alady, nebärı ekı künde men üiretken jaŋa stildı meŋgerıp, şeberlıgı būrynǧydan şyŋdala tüstı» dep süisınıptı qytailyq horeograf.
«Astana Opera» teatrynyŋ jetekşı solisı Baqtiiar Adamjannyŋ öz auzynan bala kezınde onyŋ kürespen ainalysqanyn bıldık. Baletke ol 10 jasynda kelıptı.
«Menıŋşe, qazaqy otbasynan şyqqan ūl balalar balettı bırden jaqsy körıp ketpeidı. Qyzdar qyzyǧuy mümkın. Al men äzırge losina kiıp alyp, «balet ärtısı bolǧym keledı» degen jıgıttı kezdestırgen emespın. Ol üşın uaqyt kerek. Öz basym tek tört jyldan keiın balettıŋ ne ekenın tüsıne bastadym. Balet degen – olimpiadalyq sport türınen kem tüspeitın sūlulyq pen auyr eŋbek üilesken öner. Būl jeŋıs menı qanattandyrdy. Endı būrynǧydan da ösıp-jetılıp, aldaǧy maqsattaryma qol jetkızgım keledı» degen quanyşymen bölıstı Baqtiiar Adamjan.
Mädina JAQYP
