Astanada alǧaş ret üş saiystan tūratyn triatlon jarysy öttı. Elordadaǧy «Astanalyq» saiabaǧynda ötken şarada köpşılık suda jüzıp, velosiped teuıp, odan ärı qarai jügırıp jarysty.
Jarys kezınde qatysuşylardyŋ erkın ärı qauıpsız qozǧalysy üşın Tūran daŋǧylynda «Tūlpar» köpırınen bastap äuejaidyŋ ainalma jolyna deiın kölık qozǧalysy şekteldı. Sportşylar aldymen Esıl özenınde jüzuden jarysty. Su üstındegı meje – 350 metr. Ūiymdastyruşylar būl sport türın jarysqa bırınşı ret qosqandyqtan, qaşyqtyqty qysqa etıp belgıleptı.
Sonymen, start sudan bastalyp, jüzıp şyqqan jūrt velosipedke qondy. Suǧa malynǧan sportşylar dereu kiımderın auystyryp, demderın almastan jarysty jalǧastyryp kettı. Qos doŋǧalaqty kölık üşın berılgen aralyq – 20 şaqyrym.
Ainalma jolǧa deiın baryp, ainalyp qaitqan jüirıkter velosipedten tüse sala, jügırıp jarysa kettı. Şarşap, şölırkep qalǧan jelaiaqtarǧa jolşybai qoldap, qiqu qosqandar su ūsyndy.
Jarystyŋ köp bölıgın artta qaldyrǧan olarǧa endı 2,5 şaqyrymdy eŋserse, jetıp jatyr. Osy kezeŋnıŋ özınde kımnıŋ oza keletını belgılı bolǧandai körındı. Öitkenı velosipedpen bırınşı jetken tört qatysuşy qalǧandaryna qaraǧanda oq boiy ozyq tūrǧan edı.
«Bügın osynau jarysqa qatysqan qala halqyna rizaşylyǧymyzdy bıldıremız. Belsendı tūrǧyndar demalys künı taŋǧy ūiqylaryn qiyp kelıp, köpşılıkpen bırge boi qyzdyryp, qoldau körsetıp, köŋıl köterdı. Aua raiy da qarasyp, kün aşyq boldy. Barlyǧy 147 adam bügıngı jarysqa qatysty. Olardyŋ eŋ jasy 14 jasta bolsa, ülkenı – 65 jasqa kelgen qariialar. Jüzden jüirık şyqqandardyŋ jüldelerı de – qomaqty. Bırınşı kelgenderge – toŋazytqyş, ekınşı jetkenderge – teledidar, üşınşılerge noutbukter tabystalady», – deidı Astana qalasynyŋ Dene şynyqtyru jäne sport basqarmasynyŋ basşysy Berık Marjyqpaev.
Qanşama qaşyqtyqty talmai tabandylyqpen baǧyndyrǧandardyŋ arasynan jeŋımpazdar tört sanat boiynşa anyqtaldy. Solardyŋ ışınde bärınen Avtuşko otbasynyŋ mereiı üstem boldy. Osy jarysqa arnaiy Oŋtüstıkten at terletıp kelgen qala qonaqtarynyŋ eŋbegı eş ketpedı. Erler arasynda üş saiysty 54 minut 48 sekundta aiaqtaǧan Aleksandr Avtuşko absoliuttı jeŋımpaz atandy. Al onyŋ jūbaiy Anastasiia Avtuşko barlyq qaşyqtyqty 1 saǧat 9 minutta baǧyndyryp, äielder arasynda bärınen üzdık boldy. Otbasylyq jūp triatlonmen ainalysqandaryna on jyldan asa uaqyt bolǧandyǧyn aityp, osy jarystyŋ tamaşa ūiymdastyrylǧanyn atap öttı.
Taǧy bır sondai qatysuşylardyŋ bırı astanalyq Sabyrjan Qosaq törtınşı orynda kelıp, alǧaşqy üzdık üştıkke ene almai qalǧanyna eş qynjylmaitynyn aitty. Öitkenı az ǧana uaqyttyŋ ışınde osy jarysqa daiyndalyp, jüzudıŋ qiynǧa soqqanyna qaramastan, osyndai nätije körsetkenın äjeptäuır jetıstık sanaidy eken.
«Bızdıŋ federasiia osydan üş apta būryn Burabaida triatlonnan «Qazaqstan kubogyn» ötkızdı. Federasiianyŋ qūrylǧanyna ekı jyl boldy. Osy uaqyt aralyǧynda 14 jarys ötkızdık. Al bügın elordasy Astanada qanşama halyqtyŋ basyn qosyp, taǧy bır dumandy jarysty ūiymdastyrdyq. Jarysqa äuesqoilarmen bırge ūlttyq qūramanyŋ sportşylary da qatysty. Qazır triatlonnan ūlttyq qūramada buyn almasyp jatyr. Jaŋa buyndy anyqtauda osy jarystardyŋ septıgı mol. Būl dästür jalǧasyn tauyp, 20 tamyz künı Qapşaǧai qalasynda jarys ötedı», – deidı Qazaqstan Triatlon federasiiasynyŋ prezidentı Mūrathan Toqmädi.
Ūiymdastyruşylardyŋ aituynşa, dumandy triatlondy dästürge ainaldyryp, kelesı jyly da ötkızu josparda bar eken.
