ASTANANYŊ ÜZDIK TAUARY
Otandyq önımnıŋ sapasyn arttyrudy közdeitın «Qazaqstannyŋ üzdık tauary» körme-baiqauynyŋ öŋırlık kezeŋınde elordanyŋ üzdık tauary anyqtaldy. Astana qalasy äkımınıŋ orynbasary Mälika Bektūrova jeŋımpazdardy qūttyqtap, arnaiy diplommen marapattady.
Elordada jyl saiyn şaǧyn jäne orta käsıporyndardyŋ sany artyp keledı. Üzdık tauarlar körmesı käsıpkerlerdıŋ belsendılıgın arttyryp qana qoimai, qazaqstandyq naryqty joǧary sapaly ärı bäsekege qabılettı önımmen qamtamasyz etudı közdeidı. Ekınşıden, käsıporyndar arasynda sapa menedjmentın damytuǧa yqpal etedı.
Biylǧy baiqauda äuejailar men aviakompaniialarǧa arnalǧan önımder, medisinalyq jäne elektrondy qūraldar, zergerlık būiymdar, jihaz jäne azyq-tülık öndıretın käsıporyndar baq synady. Konkurs qorytyndysy boiynşa «Üzdık öndırıstık tauar», «Tūrǧyndarǧa arnalǧan üzdık tauar», «Üzdık azyq-tülık tauary» atalymdary boiynşa jeŋımpazdar belgılı boldy.
Sonymen, sapasy men sertifikattalu ölşemderıne qarai «Üzdık öndırıstık tauar» atalymyn «Astanalyq äinekpaket şyǧaru» kompaniiasy jeŋıp aldy. Al baiqauǧa alǧaş ret qatysqan «Alab Industries» kompaniiasy ekınşı oryndy ielendı. Atalmyş kompaniia – äuejailarda keŋınen qoldanatyn ūşyp-qonu jolaǧyn öŋdeuge arnalǧan önımderdı şyǧaratyn jalǧyz käsıporyn. 2015 jyly aşylǧan kompaniia az uaqyttyŋ ışınde jetıstıkke jetken. AQŞ pen Kanadanyŋ zerthanasynda synalǧan önımderı üzdık atanyp, älemdegı aldyŋǧy qatarly 30 kompaniianyŋ qataryna qosylyp ülgerdı. 2005 jyly ırgesı qalanǧan «Speselektra» käsıporyny üşınşı oryndy qanaǧat tūtty.
«Halyqqa arnalǧan üzdık tauar» atalymy boiynşa 10-nan astam käsıporyn synǧa tüsken eken. Bırınşı orynǧa «LED Solution» kompaniiasy laiyq dep tanyldy. Jylyna 60 000 jaryq şamyn şyǧaratyn käsıporyn tūrǧyn üilerge, keŋselerge, öndırıstık nysandar men köşelerge arnalǧan jaryqdiodty şamdardyŋ 100-den astam türın öndıredı. «100 mektep, 100 auruhana» baǧdarlamasy boiynşa aumaqtyq jäne respublikalyq jobalarǧa jetekşılık jasaityn «BARK Tehnolodji» käsıporyny ekınşı oryndy ielendı. Al elordalyq «Samhat» aiaq kiım fabrikasy üşınşı oryndy qanaǧat tūtty.
«Üzdık azyq-tülık tauary» atalymy boiynşa Qazaqstan naryǧynda jetı jyldan berı talai jetıstıkke jetken «Balnūr-NS» käsıporyny jeŋıske jettı. Astanalyqtardyŋ süiıktısıne ainalǧan «Bambino» balmūzdaqtaryn satumen ainalysatyn käsıporyn elımızdıŋ 5 qalasynda 50-den astam balmūzdaq türın şyǧarady. Taza tabiǧi önımnen jasaityn käsıporynnyŋ, äsırese, qymyzdan jasalǧan balmūzdaǧyna sūranys köp. Bügınde Resei jäne Qytai naryǧyna qadam basqan.
Al ekınşı oryn «Golden Rill Trade» kompaniiasyna būiyrdy. 1998 jyly «Voda Hrustalnaia» sauda belgısımen qūrylǧan mekemenıŋ auyz suy bügınde ärbır astanalyqtyŋ üiınen tabylady.
2007 jyldary naryqqa «Romanovskii produkt» belgısımen şyqqan «Nūr Ädıl» jeke käsıporyny üşınşı orynǧa taban tıredı. 60 adamdy jūmyspen qamtyp otyrǧan mekeme nan önımderın öndırumen ainalysady.
– Üzdıkter üzeŋgı qaǧystyrǧan baiqauda elordanyŋ eŋ üzdık mekemelerı anyqtaldy. Körmede halyq qyzyǧuşylyq tanytqan önımderdıŋ bırı – ökpe terapiiasyna arnalǧan «VibroLUNG» vibroakustikalyq qūraly. Ony elordalyq mamandar zerttep şyǧarǧan. Ol fizioterapiia qūraldarynyŋ bırı ärı tynys alu aǧzalaryn emdeuge arnalǧan. Sonymen qatar, «Poleznyi produkt» mekemesı turaly aituǧa bolady. Atalmyş käsıporyn Qazaqstanda ösetın jemıs-jidekterdı zamanaui öŋdeu täsılderımen ainalysady. Mysaly, infraqyzyl keptıru täsılımen daiyndalǧan alma chipsın öndıredı. Nätijesınde almanyŋ närı özınde saqtalady. Otandyq önım importtyq deserttı almastyruy äbden mümkın, – deidı Astana qalasy Käsıpkerler palatasynyŋ direktory Ǧani Tasmaǧambetov.
Sonymen, jeŋımpazdar jyl soŋynda ötetın «Qazaqstannyŋ üzdık tauary» körme-baiqauynyŋ respublikalyq kezeŋıne joldama aldy.
Gülmira AIMAǦANBET