Aiazda aialdama qalqan bola ma?

Arqada qys 4-5 ai boiy köşpei jatyp alady. Üskırık aiazdyŋ keide aptalap bet qaratpaityn kezderı bolady. Tabiǧattyŋ būl doly mınezı dala tūrmaq, qala halqyna da oŋai timeidı. Sondyqtan qysqy mausymǧa tyŋǧylyqty qam jasamasaq, opyq jep qaluymyz kädık.Astana bilıgı qysqy mausymǧa jaz ortasynan daiyndyq jūmystaryn bastap ketedı. Jylu-elektr ortalyqtarynyŋ qazandyqtaryn jamap-jasqap, qūbyr jelılerın bütındep, qajettı otyndy jetkızıp alady. Sondai-aq tūrǧyn üilermen bırge, köşedegı avtobus aialdamalaryn da jylylap qoiady.
Aiazdy künderı balalar, nauqas adamdar, jalpy avtobus kütken jolauşylar toŋyp qalmas üşın, äsırese, mektepterge, balabaqşalarǧa, medisinalyq mekemelerge taiau ornalasqan jerlerde jyly aialdamalardyŋ tūruy maŋyzdy. Resmi derekke süiensek, astanada 1100 aialdama bolsa, onyŋ 730-ynda pavilon bar. Onyŋ 100-ı jyly aialdama. Jyl soŋyna deiın taǧy osyndai 30 aialdama ornatu josparlanǧan. Būl jönınde «Astana LRT» JŞS töraǧasynyŋ orynbasary Bauyrjan Seiıtov mälım etken bolatyn.
Keşe ǧana elorda äkımı Altai Kölgınov qala köşelerın aralap, bırqatar aialdamalardyŋ jai-küiı­men jıtı tanysyp qaitqan bolatyn. Būl jönınde äkımbylai dep jazdy:
– Bügın qaladaǧy jyly aialdamalardyŋ bırqataryna bardym. Jyluy joq aialdamalar anyqtaldy. Sonyŋ bırı – Respublika daŋǧylymen qiylysatyn Seifullin köşesındegı «Jastar saraiy» aialdamasy. Qala boiynşa osyndai aialdamalardy tekserıp şyǧu audan äkımderıne tapsyryldy. Jyluy ıstemei tūrǧan aialdamalardy baiqap jatsaŋyzdar, naqty ornalasqan jerın aitularyŋyzdy sūraimyn. Qala tūrǧyndaryna jaily boluy üşın jyly aialdamalardy köbırek saludy josparladyq, – deptı äkım Facebook-tegı paraqşasynda.
Qala basşysynyŋ jazbasy äleumettık jelını paidalanuşylardyŋ köpşılıgın beijai qaldyrmapty. A.Kölgınovtıŋ jazbasynyŋ astyna 379 adam pıkır bıldırıp, 34-ı ony öz paraqşalarynda bölısken.
Belgılı jurnalist Beibıt Ospannyŋ «Sätpaev köşesınde, «Euraziia» aumaǧynda jyly aialdama joq. Adamdar taŋerteŋ bürseŋdep tūrady» degen pıkırıne «Astana» äleumettık-käsıpkerlık korporasiiasy» AQ jauap joldapty. Mūnda «ÄKK investorlarmen bırlese otyryp, 2019 jyldyŋ jeltoqsany men 2020 jyldyŋ qaŋtar ailaryna Q.Sätpaev köşesı, 13 mekenjaiyna jyly aialdama pavilonyn ornatudy josparlanǧany, bügıngı taŋda aialdama pavilonynyŋ konstruksiialyq qūrylymyn jinau jūmys­tary jürgızılude» ekendıgı aitylǧan.
Qala tūrǧyny Aina
Kärımova «A.Baitūrsynov köşesındegı №83 mektebınıŋ maŋyna jyly aialdama kerek. 32-şı avtobus müldem uaqytynda kelmeidı!!! Adamdar üsıp-toŋyp tūrady. Jäne eŋ özektı mäsele – būl jerdegı baǧdarşam, jol ötpesı dūrys qoiylmaǧan. №83-şı aialdamadan tüskennen keiın qarama-qarsy 83-şı mektep tūr. Al baǧdarşam ekı jaqta alysta jatyr. Eskerıŋız: öte alysta!!! Baǧdarşam alysta bolǧandyqtan, balalar tügılı ülkender būl jerdı ainalyp ötpei, joldy kesıp ötedı. Bırınşıden, jol erejesı būzylyp otyr. Ekınşıden, būl jerde maşinalar öte qatty jyldamdyqpen jüredı (sebebı qalanyŋ bır şetı). Men balalarymyzdyŋ qauıpsızdıgı üşın qatty alaŋdaimyn!!! Ötınış, osy jazǧanymyzdy qaperıŋızge alyp, bır jolaq ornatuǧa mümkındık jasa­ŋyzşy! Men būl turaly bırneşe ret 109-ǧa zvondap, jazyp (beine, foto) salyp ötınışımdı bıldırgenmın. Ökınışke qarai, jauapsyz qaluda. Osy ötınışımdı jauapsyz qaldyrmauyŋyzdy ötınıp sūraimyn!» deptı.
Rita Tolysbai «Respub­lika daŋǧylyndaǧy Samal aialdamasy eşqandai jylusyz, ışıne kırıp, kerısınşe, toŋyp qaldym. Qalanyŋ qaq ortasynda tūrǧan aialdama jyluǧa qosylmaǧan. Nege eşkım teksermeidı eken osy jaǧdaidy» dep jazady.
Jasūlan Omarov
Dosmūhamedov köşesındegı «Sosium» tūrǧyn üi keşenıne jyly aialdama tūrmaq, avtobustyŋ müldem jürmeitının aitady. Būl mäsele qaşan şeşıledı dep sūraq qoiypty.
Ainūr Qozybaeva Orynbor köşesındegı, Ministr­lıkter üiındegı, Jastar teatryndaǧy (būrynǧy K.Baiseiıtova), Qarjy ortalyǧyndaǧy jabyq aialdamalar jyluǧa qosylmaǧan dep tızbelep şyqqan.
Ainur Eshanova Qabanbai batyr daŋǧyly boiynda bırde-bır jyly aialdama joqtyǧyn aityp şaǧymdanǧan. Aizhan Ait-Myrza Esıl audanynyŋ köptegen jerlerınde jyly aialdamalar tapşylyǧyn jetkızedı. «Äsırese, Jaǧalau yqşam audanynda
Aitmatov köşesınen bastap ortalyqqa deiın köp jerlerde joq. Jastar köp tūrady, kışkentai balalar köp. Qazırgı qysta avtobus kölıkterın de köbeitse eken degen tılek» degen ötınışın joldaǧan.
Gauhartas Şolimova №73 mektep-liseiınıŋ janyndaǧy Aqyrtas aialdamasynda aiazda balabaqşadan alyp şyqqan kışkentai balasy ekeuı №4 avtobusty 50 minut kütıp, aqyry taksige mındık dep şaǧymdanyp jazypty.
Aita keteiık, elorda äkımı Altai Kölgınov Facebook paraqşasynda jyly aialdamalar mäselesın qozǧaǧanymen, tūrǧyndar qosalqy basqa da köptegen problemalardy köterdı. Onyŋ ışınde avtobus qatynasy, köşe tazalyǧy, joldyŋ taiǧanaqtyǧy men mūzqatqaq, tıptı taksi qyzmetı baǧasynyŋ qymbatşylyǧyn da aitypty. Bır jaqsysy, halyqtyŋ aryzy eskerusız qalmai, oǧan Nūr-Sūltan qalasy äkımdıgınıŋ iKomek ortalyǧynyŋ, «Astana LRT» JŞS keŋesşılerı, Baiqoŋyr audanynyŋ baspasöz qyzmetı, qalanyŋ Säulet, qala qūrylysy jäne jer qatynastary basqarmasy, t.b. resmi organdar lezde jauap bergen. Iаǧni, äkımnıŋ Facebook paraqşasyndaǧy jazbasy oilamaǧan jerden tūrǧyndardyŋ aryz-şaǧymdaryn qaraǧan Aşyq esık şarasyna ainalyp kettı dese de bolady.