Bügın «Astana Opera» opera jäne balet teatrynyŋ sahnasynda KSRO jäne Qazaqstan Respublikasynyŋ halyq ärtısı, Sosialistık Eŋbek Erı, qazaqtyŋ būlbūly atanǧan Bibıgül Tölegenovanyŋ 85 jyldyq mereitoiyna arnalǧan «Süiu, ümıttenu jäne senu» atty gala-konsertı ötedı.
Baǧdarlamaǧa qazaqstandyq jäne şeteldık kompozitorlardyŋ operalarynan ariialar, halyq änderı, romanstar jäne t.b. şyǧarmalar engen. Sondai-aq, körermender aldynda «Astana Opera» hory jäne simfoniialyq orkestrınıŋ qatysuymen mereitoi iesınıŋ qūrmetıne belgılı qazaqstandyq opera änşılerı, şäkırtterı, onyŋ dästürın jalǧastyruşylar, Bibıgül Tölegenova konkursynyŋ laureattary jäne basqalary än şyrqaidy.
Körme ūiymdastyrylyp, onda B.Tölegenovanyŋ qoiylymdarǧa jäne konsertterge kigen kostiumderı, jeke zattary men är jyldary alǧan marapattary qoiylady. Sonymen qatar, änşınıŋ ömırıne jäne şyǧarmaşylyǧyna arnalǧan fotogalereiany da tamaşalauǧa bolady.
Ärtıs bügınde qatarlas qazaq opera änşılerınen jalǧyz qalǧanyn aityp: «Biyl – mereitoiym, sol sebeptı halqyma esep bergım keldı. Qazırgıler ony «benefis» deidı eken. Sony osy «Astana Opera» sahnasynda ötkızbekşımın. Mūndaǧy solisterdıŋ teŋ jartysy – menıŋ konkursymnyŋ laureattary. Olardyŋ qatarynda Sündet Baiǧojin, Älfiia Kärımova, Medet Şotabaev, Talǧat Mūsabaev, taǧy basqalardy atar edım. Būl gala-konsert bärınen būryn menıŋ dauysymdy estıgısı keletın tyŋdauşylaryma arnalady» dedı änşı tebırenıp.
Jūma ǦAZİEV
