Keşe Elbasy Nūrsūltan Nazarbaev Aqordada elge eŋbegı sıŋgen bırneşe otandastarymyzǧa memlekettık nagradalardy tapsyrdy. Syilyqqa saiasat, öner, bılım, medisina jäne taǧy da basqa äleumettık salalarda ter tökken azamattar laiyqty dep tanyldy.
«Bız täuelsızdıgımızdıŋ 23 jylynda ırgelı memleket qūryp, ekonomikany qalypqa keltırdık. Qazaqstandy düniejüzıne tanymal ettık. Äleumettık jaǧdai, bılım beru, ǧylym, önerde köptegen jetıstıkterge jettık. Osynyŋ bärın bızdıŋ halyq jasady, bügıngı jaqsy ömır el azamattarynyŋ eren eŋbegınıŋ arqasynda. Sızder bırlıgımızdı nyǧaityp, berekemızdı arttyruǧa atsalysyp kelesızder. Sondyqtan bügın özderıŋızge tapsyrylatyn memlekettık nagradalardyŋ maŋyzy öte zor» dedı Nūrsūltan Nazarbaev.
Elbasy būl marapattyŋ el damuyna üles qosqan qazaqstandyqtardyŋ eŋbekterıne berılgen memlekettıŋ baǧasy ekenın atai kele, syilyqty küllı Qazaqstan boiynşa marapattalyp otyrǧan myŋ jarym adamnyŋ bärıne öz qolymen tapsyra almaitynyn aitty.
Prezident eŋ aldymen «Qazaqstannyŋ Eŋbek Erı» ataǧyn eldı äleumettık-gumanitarlyq damytudaǧy jetıstıkterı men mädeniettı damytudaǧy airyqşa ülesı üşın Qazaq ūlttyq öner universitetınıŋ rektory Aiman Mūsaqojaevaǧa tapsyrdy. Keiın «Otan» ordenıne Qasym-Jomart Toqaev bastaǧan bırneşe azamat ie boldy.
Sonymen qatar, Elbasy I, II, III därejelı «Barys», «Parasat» jäne I, II därejelı «Dostyq» ordenderın de kezek-kezegımen tabystai otyryp:
«Sızder elımızdıŋ bırlıgıne syzat tüsırmei, halyqtyŋ äl-auqatyn jaqsartuǧa üles qosyp jürsızder. Būl nagradalar – sızderdıŋ eŋbekterıŋızge bergen memlekettıŋ baǧasy» dep sözın tüiındedı.
Nūrislam QŪSPANǦALİ
