Keşe Elbasy Nūrsūltan Nazarbaevtyŋ qatysuymen «Otan qorǧauşylar» monumentıne «Daŋq» gül tızbegı men gül sebetterın qoiu räsımı öttı.
«Otan qorǧauşylar» alaŋynyŋ aldynda jinalǧan jūrtşylyqtyŋ qarasy köp. Jeŋıstıŋ 70 jyldyǧyna orai ötkızılgen būl şaraǧa 10 myŋǧa juyq adam qatysty. Sonyŋ ışınde elımızdıŋ tükpır-tükpırınen kelgen soǧys ardagerlerı bar.
Arnaiy avtobustarmen alaŋǧa jetkızılgen qarttardy «Jas ūlan» respublikalyk mektebınıŋ jetkınşekterı kütıp alyp, oryndaryna jaiǧastyryp jatty. Ainalada maidan änderı äuelep, är jürekke erlık pen otansüigıştık sezımın ūialatty.
Saltanatty qarauyl küzetken mäŋgılık alauǧa gülşoqtary qoiylǧannan keiın jinalǧan qauym soǧysta qaza tapqan sarbazdardy bır minuttyq ünsızdıkpen eske aldy.
Resmi räsımnen keiın Memleket basşysy ardagerlermen tıldesıp, hal-jaǧdailaryn sūrasty.
Saltanatty şara kezınde Prezident barşa qazaqstandyqtardy Jeŋıs künımen qūttyqtady.
– Soǧysta milliondaǧan adam maidan dalasynda qaza tapty jäne sonşasy jaraqat aldy, jaqyndary japa şektı. Bız – jeŋımpaz äkelerdıŋ baqytty ūrpaǧymyz. Eger olar jeŋıske jetpegende, qazır bızdıŋ jaǧdaiymyz qandai bolaryn elestetudıŋ özı qiyn. Sondyqtan ardagerlerımız merekede ǧana emes, kündelıktı ömırde de barlyq qūrmetke laiyq. Men jastardyŋ ardagerlerge ärdaiym kömekteskenın, qart ata-analaryn qūrmettegenın qalaimyn, bızdıŋ halyq solai boluǧa tiıs. Ardagerler aramyzda aman-esen ūzaq jürıp, adamgerşılık, moraldyq ūstanymdarymen jas buynǧa ülgı bola bersın. Merekelerıŋızben, qymbatty qazaqstandyqtar! Ärbır otbasyǧa baqyt, tabys jäne aşyq aspan tıleimın! – dedı Nūrsūltan Äbışūly.
İä, Otan üşın ot keşken ardagerlerımızge qandai qūrmet te jarasady. Bügınde elordada 206 soǧys ardagerı tūrady. Olarǧa türlı kömekter körsetılıp jatyr. Jeŋıstıŋ 70 jyldyǧyna orai är ardagerge 1 million 100 myŋ teŋge berıldı. Qariialardyŋ barlyǧy da pätermen qamtamasyz etılıp, üilerıne kürdelı jöndeu jūmystary jürgızılude.
Qymbat TOQTAMŪRAT
