Men aǧylşynşadan qaqpaimyn. Qasymdaǧy tılşılerdıŋ de «I love you!» degennen basqaǧa tılderı kelmei-aq qoiǧan. Söite tūra, bärımız aǧylşyndyq ärıptesımız Djonatan Niuvellden ūialyp jürmız. Özımız onyŋ ana tılın meŋgere almaǧandyqtan emes, esıgımızden esın şyǧara quǧanymyz üşın! Qalai deisız ǧoi?..
Bırde ol jıgıt Astanaǧa kelgende «halyqaralyq» degen märtebesı bar äuejaiymyzdan «qatty sasyp, bettı basyp, tūra qaşty jalma-jan». Elıne jetıp alǧannan keiın, «qazaqstandyq ūlttardyŋ» halyqaralyq tılden maqūrymdau ekenın betke salyq etıp, äleumettık jelı arqyly älemge jar saldy. Äuejai terminaldarynan qate jazulardy körıp, öz közıne özı senbeptı. Endı būǧan özge jūrt sene me eken degendei, bır surettı ǧalamtorǧa jariialap körgen. Söitse, teletılşı Djonatandy bız ras quyppyz. Büi deidı ol: «Qazaq elordasynyŋ «Astanaǧa hoş keldıŋız!» degenderı – dūrys audarma. Al, «Push» – «iter» de, «Push off» – «būl jerden ket» degen söz. Būndai jazudy äuejaidan syrtqa şyǧatyn onşaqty esıkten baiqadym. Demek, jolauşy «būl jerden ket» degendı Qazaqstannyŋ kez kelgen esıgınen oqi alady. Basqasyn qaidam, äiteuır, astanalyq äuejaiǧa jaŋa audarmaşy qajet dep oilaimyn».
Üibai-ai! Ūiat-ai! Masqara-ai!.. Esıgımdı lastapty.
Opşym, «özıŋe qarai», «özıŋnen kerı» dep sözdı köbeitıp jürgen audarmasymaqtarymyz sol Djokeŋnıŋ tılınen tıkelei tärjımalaǧanda «tart», «iter» ǧana eken ǧoi. Bır sözdı ekı etıp, ekı sözdı ekı eseleuden köretın qūqaiymyz – osy!
Aǧylşyn ärıptesımnıŋ bazynasy ǧalamtorǧa şyǧa salysymen, Astana äuejaiynyŋ prezidentı Qairat Jauhanov qate jazulardyŋ tüzetılgendıgın bylaişa habarlap jatty: «Astana äuejaiyndaǧy jolauşylar terminalynyŋ resımdeluıne asa ülken köŋıl bölgenı üşın Djonatan Niuvell myrzaǧa alǧysymdy bıldıremın!». Beu de! Qyzdy-qyzdymen «Niuveldı Nobelge ūsynu kerek!» demegenıne şükır. Eger anau qatenı eptep aǧylşyn tılın oqyǧan bızdıŋ körşı qyz köre qalsa, oǧan «pıştu…» dep mūryn şüiırulerı mümkın. Qazaqstandyq qazaq bolǧany üşın ǧana jazyqty bolyp qalar edı-au, baiǧūs!
Ol äuejaiymyzdyŋ taǧy bır hikaiasy bar. Biylǧy jazdyŋ basynda tabiǧatqa zalal keltırgenı üşın 13 mln 600 myŋ teŋge aiyppūlǧa tüsıp qalǧan. Ösek emes, Astananyŋ Aviasiialyq kölıktık prokurory Nūrlan Ahmetbaevtyŋ özı aityp otyr. «Äue kerosinı tögılgennen keiın tekseru jürgızılıp, äuejaidyŋ ekologiialyq zaŋnamany būzǧandyǧy anyqtaldy» deidı ol.
Üibai-ai! Ūiat-ai! Masqara-ai!.. Esılımdı lastapty.
Erkeǧali BEISENOV
