Nūr-Sūltan qalasy Işkı saiasat basqarmasy qoldauymen Qazaqstan Respublikasy Täuelsızdıgınıŋ 30 jyldyǧy aiasynda elordanyŋ mädeni kodyn qalyptastyru maqsatynda «Qazaqstan täuelsızdıgıne 30 jyl: elorda – mädeniet pen önerdıŋ ordasy» atty döŋgelek üstel ūiymdastyryldy.
Jobanyŋ maqsaty – qoǧamdyq sanany jaŋǧyrtu jäne astanany mädeni damytu arqyly elordanyŋ mädeni kodynyŋ modelın qalyptastyru, elordanyŋ mädeni jäne kielı oryndaryn, halyqtyŋ mädeni tırşılıgın zertteu, astananyŋ äleumettanuşylaryn, mädeniettanuşylaryn, saiasattanuşylary men mädeni qoǧamdastyqtarynyŋ mamandaryn tarta otyryp, mädeni kod modelın talqylau.
Döŋgelek üstel aiasynda qalanyŋ mädeni kodyn qalyptastyru jäne elordany odan ärı mädeni damytu, qala tūrǧynynyŋ beinesın, sondai-aq «Nūr-Sūltan – jaily qala», «Nūr-Sūltan – salamatty qala», «Nūr-Sūltan – beibıtşılık qalasy» beinelerın qalyptastyru mäselelerı talqylandy. Jiynǧa Qazaqstan Respublikasy Parlamentı Mäjılısınıŋ deputaty Sauytbek Abdrahmanov, Nūr-Sūltan qalasynyŋ Işkı saiasat basqarmasynyŋ basşysy Dauren Babamūratov jäne respublikalyq etnomädeni bırlestıkterdıŋ basşylary men ökılderı qatysty.
«Elordamyzdaǧy «Dostyq üiınde» äserlı ıs-şaralar jüielı türde ötıp tūrady. Bügın sondai şaralardyŋ bırı öttı. «Qazaqstan täuelsızdıgıne 30 jyl: Elorda – mädeniet pen önerdıŋ ordasy» taqyrybyna arnalǧan döŋgelek üstelde Nūr-Sūltan qalasynyŋ mädeni kodyn qalyptastyru, elordanyŋ mädeni deŋgeiın köteru, qala tūrǧyndarynyŋ estetikalyq tärbiesı turaly mäseleler qozǧaldy. Tarih mäselelerı aityldy. Bügıngı taŋda elordamyzda mädeni orta qalyptastyru, elordalyqtardyŋ qalaǧa degen qūrmetın arttyru mäselelerı jan-jaqty talqylandy. Bügıngı mädeni mekemelerdıŋ mümkındıgın paidalanu mäselelerı qozǧaldy. Sonymen bırge, keiıngı kezde qalada alaŋdatarlyq oqiǧalardyŋ oryn alyp otyrǧany. Mysaly, jedel satylarda, üidıŋ kıreberısterındegı jaǧymsyz jaǧdailar, keibır jastardyŋ özın körsetu üşın oǧaş qylyqtarǧa baruy, olardy äleumettık jelı arqyly batyrsynyp taratuy syndy jaǧdailar bızdı alaŋdatyp otyr. Būlardyŋ barlyǧy – elorda jastary men tūrǧyndaryna jaraspaityn mınezder. Bız osy ıs-äreketke qalai jauap beruımız kerek? Otyrysta osy mäseleler talqylandy, aldaǧy uaqytta nätijelerın beredı dep senemız» dedı Mäjılıs deputaty Sauytbek Abdrahmanov.
