Astanada ötıp jatqan «EURASIAN BOOK FAIR – 2024» halyqaralyq kıtap körme-järmeŋkesı aiasynda aqyn Aqūştap Baqtygereevanyŋ «Menıŋ Farizam» atty estelık kıtabynyŋ tanystyrylymy ötıp, tūsauy kesıldı.
Qazaq ädebietıne özındık ün qosqan qos aru Fariza Oŋǧarsynova men Aqūştap Baqtygereevanyŋ dostyǧy köpşılıkke mälım. Aqūştap aqyn būl kıtabynda qazaq äielderı arasynan şyqqan bıregei qalamger, halyqpen etene aralasqan tanymal tūlǧa Fariza Oŋǧarsynova turaly syr şertedı.
– Zamandasym Fariza ekeumızge qazaq qyzynyŋ da öleŋ jaza alatynyn däleldeuge tura keldı. Bız ony däleldedık te. Äsırese, Fariza. Sebebı ol bükıl qyz ǧūmyryn, köktemın, ömırın öleŋge arnady. Mıne, kıtapta osy dünieler qamtyldy. Sondai-aq studenttık kezden bırge ötkızgen şaǧymyz, talqylanǧan oiymyz aitylady. Özderıŋızge mälım, Fariza deputattyqqa, men otbasylyq ömırge bet būrdym. Qazaq qyzdarynyŋ qairatkerlıgımen qosa adamgerşılıgı, dostyqqa berıktıgı, aqyndyq qasietterı turaly ädemı estelık qaldyrǧym keldı. Būl eŋbegım Fariza Oŋǧarsynovanyŋ 85 jyldyǧyna, menıŋ 80 jyldyǧyma orailastyrylyp, jaryq kördı, – deidı aqyn Aqūştap Baqtygereeva.
Kıtaptyŋ tūsaukeserıne belgılı aqyn-jazuşylar, qoǧam qairatkerlerı, jastar, elorda tūrǧyndary men qonaqtary qatysty.
– Aqūştap pen Fariza apalarymyzdyŋ öleŋderın studenttık şaqtan jattap östık. Köpşılık aiauly aqynnyŋ mınezın jaqsy bıledı. Sol jaiynda kıtapta jaqsy jazylǧan. Fariza apai Aqūştap apaiǧa «ne qalam ūsta ne qazan ūsta» degen. Ömır ǧoi, ruhy myqty qyzdarǧa mahabbaty myqty adam kezdespegen şyǧar… dep Oŋaigül Tūrjan oiymen bölıstı.
Qazaq poeziiasynyŋ padişasy Fariza Oŋǧarsynova jaily estelık-esse köpşılık oqyrmandy jalyqtyrmaityn tartymdy tılmen jazylǧan. Tanystyrylymnan soŋ baǧaly kıtap oqyrmandarǧa jol tartty.
Is-şara soŋynda aqyn, Qazaqstan Jazuşylar odaǧy Astana qalasy filialynyŋ direktory Däuletkerei Käpūly «Foliant» baspasy men jinalǧan qauymnyŋ atynan Aqūştap Baqtygereevaǧa iyǧyna şapan jauyp, qūrmet körsettı.
Sabina KÄKIMJAN
