Qazaqstan Respublikasynyŋ Memlekettık rämızder künı elorda törınde erekşe serpınmen atalyp öttı. Jastar saiasaty mäselelerı jönındegı basqarmanyŋ ūiytqy boluymen ūiymdastyrylǧan «Menıŋ Qazaqstanym! Menıŋ Astanam!» jäne «Patriotizm tolqynynda» aksiialary astanalyq jastardyŋ otansüigıştıgın, eljandylyǧyn, belsendılıgın körsettı.
Memlekettık rämızderımızdı ūlyqtauǧa jinalǧan jastar aldymen Esıl özenı jaǧalauyna jinalyp fleş-mob ūiymdastyrdy. Būl būqaralyq şaraǧa joǧary oqu oryndary men kolledjderden 500-ge juyq student-jas qatysty. Merekelık ruhpen jıgerlengen jastar Otan turaly, el jüregıne balanǧan Astana jaily änderdı şyrqap, Esıl tolqynymen terbetılıp bi biledı.
– Menıŋ tuǧan elım-Otanym – Qazaqstannyŋ memlekettık rämızderı künı elımızdıŋ erekşe merekesı dep bılemın. Tuymyz ben Eltaŋbamyz eldıgımızdıŋ basty belgısı bolyp tabylady. Al Änūranymyz şyrqalǧanda, menıŋ jüregım qaşanda tolqyp tūrady, şattyqqa bölenedı. Bügın de osy şaraǧa qatysyp, sondai küige tüsıp tūrmyn. Sondyqtan da memlekettık rämızderımızdı qūrmetteu men ūlyqtai bılu är qazaqstandyqtyŋ qasiettı paryzy bolsa dep tıleimın, – deidı osy şaraǧa qatysuşy student Aijan Qasymova.
Esıl üstındegı zaulaǧan kemede Qazaqstan tuyn jelbıretken jastardyŋ köŋıl-küiı Astana jūrtşylyǧyna eldık rämızderımızdıŋ asa qūndylyǧyn aişyqtap körsetkendei äser berdı. Kök bairaqty köterıp, Otandy jyrǧa qosqan jastarǧa qol būlǧap rizaşylyǧyn bıldırıp jatqan adamdarǧa qarap osyndai oiǧa berıldık.
Esıldegı eldıktı äspettegen şaradan keiın «Däulet» sport keşenınde ötken «Menıŋ Qazaqstanym! Menıŋ Astanam!» atty aksiia da elorda törındegı atalyp ötılgen merekenıŋ män-maǧynasyn aişyqtai tüstı. Būl şaraǧa jastarmen qatar memlekettık organdar men qoǧamdyq ūiymdardyŋ ökılderı qatysyp, eldık rämızderımızdı ūlyqtauǧa arnalǧan teatrlandyrylǧan qoiylymdardy tamaşalady. Prezident polkynyŋ Qūrmettı qarauyly Tuymyz ben Eltaŋbamyzdy alyp şyqqanda Änūranymyz şyrqalyp, keşen ışındegı barlyq adam qoldaryn jürekterıne qoiyp, saltanatty şaranyŋ ruhyn sezındı. Aksiia barysynda Qazaqstan tuyn talai halyqaralyq jarystarda biıkten jelbıretken sportşylar Daniiar Eleusınov pen Iliias Süleimenov söz söilep, «Bäiterek». «Aqseleu», «Arlan» toptary men bırqatar estrada jūldyzdary än şyrqady.
Kenje QONYSBAI
