Nūrsūltan Nazarbaev: Astana – ūlttyq armanymyzdyŋ jylnamasy
Astananyŋ toiy bastaldy! Elbasy Nūrsūltan Nazarbaevtyŋ qatysuymen, qalyptasqan dästür boiynşa memlekettık Tu kökke köterıldı.
– Qazaq balasynyŋ myzǧymas ta mūqalmas erlık dästürınıŋ tamyry tereŋde jatyr. Halqymyz üşın kögınen köterılgen bairaqtan qasiettı nyşan bolmaǧan. El şetıne jau kelse, bızdıŋ batyr babalarymyz osy bairaqtyŋ tübınen tabylǧan. Azattyq jolyndaǧy arpalystarda erlerımız eldıktıŋ tuyn eŋkeitpes üşın jandaryn qūrban qylǧan. Elı esıl erlerıne «tuyŋ jyǧylmasyn!» dep bata bergen. Bız, bügıngı täuelsız qazaq elınıŋ azamattary, osy bata boiyna daryǧan ūrpaqpyz. Egemendık alǧannan berı, kök bairaǧymyzdy alasartpai, elımız tynyş, eŋsemız biık bolyp, ösıp-örkendep kelemız, – dedı Elbasy öz sözınde.
Bügınde Astana bar qazaqtyŋ bas qalasyna ainaldy. Saltanatty jiynda Prezident elordanyŋ qalyptasuyna erekşe toqtaldy.
– Jas Astana tarihy – aqiqatqa ainalǧan ūlttyq armanymyzdyŋ jylnamasy. Osy jyldary elımızdıŋ barlyq öŋırınen kelgen jüz myŋdaǧan qazaqstandyq elordamyzdyŋ qūrylysy men qalyptasuyna eleulı ülesterın qosty. Astana – är qazaqstandyq üşın olardyŋ jüregıne jaqyn, bız öz qolymyzben tūrǧyzyp jatqan jaŋa otanymyzdyŋ bır bölıgı, – dei kele Memleket basşysy elorda elımızdıŋ jaŋa ruhani-mädeni ortalyǧyna ainalǧanyn aitty.
Halqymyzdyŋ bırlıgın körsetetın Astananyŋ 15 jyldyǧy – Qazaqstannyŋ jalpyūlttyq merekesı. Elbasynyŋ aituynşa, Astana eldıŋ barlyq öŋırıne damudyŋ ülgısın körsetıp keledı. Barlyq oblys ortalyqtarymen özge de qalalar Astanaǧa qarap jaŋa nysandar saluda, boi tüzeude. Elbasy «Bügıngı Tuymyz tūǧyrly, elımız ǧūmyrly bolsyn. Azat aspanymyzda altyn qyran qalyqtaǧan mäŋgılık elımızdıŋ bolaşaǧy bekem bolsyn» degen aqjarma tılegın jetkızdı.
Saltanatty jiynda Qazaqstannyŋ äskeri joǧary oqu oryndarynyŋ üzdık tülekterı Prezident qolynan ofiserlık şen aldy. Jas ofiserler Elbasynyŋ aldynda otanymyzdyŋ qauıpsızdıgın qorǧauǧa ant berdı.
Dästürlı räsım soŋynda Elbasy astanalyqtarmen aşyq-jarqyn äŋgımelestı.
Gülmira AIMAǦANBET