Ösuın toqtatqan ormandardy qalpyna keltıru jäne qaita otyrǧyzu arqyly jaŋartu mäselesı bügınde tek qazaqstandyq ǧalymdardy ǧana emes, küllı älem oqymystylaryn oilandyruda. Däl osy mäsele seisenbı künı S.Seifullin atyndaǧy Qazaq agrotehnikalyq universitetınde ötken halyqaralyq forumǧa arqau boldy.
Türkiianyŋ Kastamonu universitetı men Astanadaǧy Qazaq agrotehnikalyq universitetı bırlesıp ūiymdastyrǧan būl şaraǧa älemnıŋ 15 memleketınen, atap aitsaq, Türkiia, Resei, Polşa, İtaliia, Germaniia, Chehiia, Slovakiia, Marokko, Äzerbaijan, Qyrǧyzstan, Özbekstan, Gruziia, İran, Nigeriia men Qazaqstannan 140-tan astam ǧalymdar men mamandar qatysty.
Şara barysynda QazATU rektory Aqylbek Kürışbaev söz söilep, bızdıŋ el tek ösuın toqtatqan ormandardy qalpyna keltırumen ainalysyp qana qoimaitynyn, sonymen bırge Qazaqstan aǧaş egıp, jaŋa orman alqaptaryn da ösıretının alǧa tartty.
«Elbasynyŋ tıkelei baqylauymen Astananyŋ töŋıregınde ǧajaiyp Astana ormany «Jasyl beldeuı» boi köterdı. Osydan 10-15 jyl būryn Astana aumaǧy bos jatqan sary dala bolsa, qazırgı taŋda būl aimaqty 73 000 ga orman alqaptary alyp jatyr» dedı rektor. Būl mäsele Memleket basşysynyŋ nazarynan tys qalyp körgen emes. İndustriialandyru baǧdarlamalary şeŋberınde ǧylymnyŋ ekonomika salalarymen jäne mamandar daiyndaumen ainalysatyn on joǧary oqu orny anyqtalǧanyn aita kele, Elbasy osy maqsattarǧa 2017 jylǧa deiın 10 milliard teŋge baǧyttai otyryp, olardyŋ materialdyq-tehnikalyq bazasyn qalyptastyrudy tapsyrǧan bolatyn.
QazATU-dıŋ «Orman resurstary jəne orman şaruaşylyǧy» kafedrasynyŋ aǧa oqytuşysy, geografiia ǧylymynyŋ kandidaty Nūrgül Qazanǧapova osy mäsele jönınde äŋgımeledı. Onyŋ aituynşa, orman şaruaşylyǧy – QazATU-de qarqyndap damyp kele jatqan bırden-bır baǧyt. 2006 jyldan berı bılım men ǧylymdy bırıktıre otyryp osy baǧytta mamandar daiyndap, elımızdegı salalyq ǧylymi ortalyq Qazaq orman şaruaşylyǧy jäne agromeliorasiialau ǧylymi-zertteu institutynyŋ tıkelei qoldauymen Şuchinsk qalasynda «Sary-Arqa» mamandandyrylǧan ǧylymi ortalyǧy aimaǧy qūrylǧan. Alǧaşynda studentter teoriialyq pänderdı Astana qalasynda oqyp, keiın alǧan bılımın Şuchinsk qalasynda tereŋdetılgen täjıribe daǧdysymen ūştastyrǧanyn tılge tiek etken N.Qazanǧapova oqu ürdısıne zerthana jäne ǧylymi-eksperimentaldy infraqūrylymdy institut kırıstırılgenın jetkızdı.
Odan soŋ forumǧa qatysuşylar atalmyş joǧary oqu ornynyŋ aumaǧyndaǧy eskertkış alleiaǧa 30-dan asa qylqan japyraqty aǧaştar otyrǧyzdy. Keiın ormandardyŋ azuy men ony qalpyna keltıru mehanizmın jetıldıru jaiyndaǧy özekjardy pıkırlerımen almasty.
Gülbarşyn ÖKEŞQYZY
