QAZAQ ESTRADASYNYŊ QYRANDARY
Qazaq estradasynyŋ qazanyn ortaitpai, otyn öşırmegen ekı top bolsa, sonyŋ bırı – «MuzArt».
Tamyljyǧan änderımen talaidyŋ jüregıne jol salyp, janyn tebırentken būl ūjym biyl 15 jasqa toldy. Ötkendı saralap, oi tüietın, tyndyrylǧan tırlıkke esep beretın şaq naǧyz. Osy oraida «MuzArt» önerpazdary Astana törınde auqymdy şyǧarmaşylyq keşın ūiymdastyrmaqşy. Dübırlı toi 8 şılde künı «Qazaqstan» ortalyq konsert zalynda ötedı.
JARYQ JŪLDYZ JARQ ETTI
Elımız egemendık alǧan tūsta qazaq muzykasy on şaqty jyldai ötpelı kezeŋdı bastan keşıp, üreŋ-süreŋ küide boldy. Būl qūbylys, äsırese, estrada janrynda qattyraq baiqaldy. Osy kezde reseilık ärıptesterınıŋ ızın sättı jalǧastyra bılgen orystıldı änşıler otandyq şou-bizneske oŋai beiımdelıp kettı. Qaida barsaŋ, Parviz Nazarov, Kirill Li, «Iаşlyk» jäne «Miuzikolanyŋ» ataqtary aspandap tūrdy. Al qazaqtıldı ortadan tek «ABK» ǧana būlt arasyndaǧy naizaǧaidai anda-sanda jarq ete qalatyn. Bıraq jalǧyz toptyŋ äreketı täi-täi basqan qazaq estradasynyŋ qanatyn qataityp, basqalarmen bäsekelese aluyna jetkılıksız bolǧany aidan anyq edı. Osylaişa naryq deitın asau teŋızde qaiyqtai qaltyldaǧan qazaqtıldı sahna öz arnasyn HHI ǧasyrdyŋ tabaldyryǧyn attaǧan soŋ baryp tapty. Sol köştıŋ basynda «MuzArt» toby tūrǧanyn eşkım joqqa şyǧara almas.
Esımı bala künınen elge tanys Meirambektıŋ mūŋdy qoŋyr ünı, Säkennıŋ sänı kelısken tūlǧasy men aşyq tenor dauysy, Maqsattan maidai esken biiazylyq lebı bır-bırımen ündesıp, tyŋdarmandy lezde baurap äkettı. Topqa keiınnen qosylǧan Kenjebektıŋ de özındık tūnyqtyǧy trio ajaryn odan saiyn aşa tüstı. Änge degen eptılıgımen qatar, talǧamǧa degen tektılıgın de tanytqan «MuzArt» jıgıtterı är tuyndynyŋ tälımı men tärbiesıne basa nazar audardy. Sonyŋ arqasynda basqaǧa ūqsamaityn jaŋa stil, tyŋ bolmys qalyptastyryp, qazaqtıldı jäne orystıldı bolyp qaq jarylǧan qazaqstandyq tyŋdarmandy ortaq auditoriiaǧa toǧystyrdy. Qysqasy, «MuzArt» naryqtyŋ mūzyna taiǧanaǧan ūlttyq estradamyzdy aiaǧynan tık tūrǧyzyp, daŋǧyl jolǧa salyp berdı.
EŊBEK ESKERUSIZ QALMAIDY
Sahnada özderıne elıktegen toptar köbeigende «MuzArt» müşelerı taǧy da tapqyrlyq pen tabandylyq tanytty. Olar ülken ūjymdy daiarlau men saqtaudyŋ qiynşylyǧyna qaramastan, täuekelge bel buyp, vokaldy-instrumentaldy ansambl qūrdy. Toptyŋ art-direktory Erlan Jünısbaimen, muzykalyq prodiuserı Arman Beksūltanmen aqyldasa otyryp, qabılet-qarymy myqty muzykanttardyŋ basyn bırıktırdı. Qazırgı taŋda «MuzArt» qūramynda Meirambek Besbaev, Säken Maiǧaziev, Kenjebek Janäbılevpen qatar Ǧalymjan Artyqbaev, Erlan Qūlahmetov, Beksūltan Arman, Erık Jasaqbaev sekıldı talantty azamattar bar. Jūrttyŋ köbı kompiuterdıŋ quatyna süienıp, fonogrammaǧa den qoiyp jatqanda atalmyş ūjym vokaldy-instrumentaldy ansambldıŋ süiemeldeuımen tırı dauysta än salyp jür.
Halyqtyŋ ystyq yqylasyna bölengen «MuzArt» müşelerınıŋ eŋbegı laiyqty därejede baǧalanuda. Nätijesınde Meirambek Besbaev, Säken Maiǧaziev jäne Kenjebek Janäbılov «Daryn» Memlekettık jastar syilyǧynyŋ iegerlerı bolyp, Qazaqstannyŋ eŋbek sıŋırgen mädeniet qairatkerlerı atandy. Būdan bölek, «Altyn samūryq» jobasynyŋ on üzdıgı tızımıne engenı üşın marapattaldy. Sonymen qosa, «MuzArt» toby 2013 jyly qyrküiekte «Muzzone» telearnasynyŋ EMA premiiasynda «Üzdık ūjym» nominasiiasyn jeŋıp aldy.
Sahna önerı qalyŋ orman tärızdı. Onda myŋ san aǧaş ösıp, jetıledı. Keibıreuı tym älsız, alǧa ūmtyluǧa qauqarsyz bolady. Mūndailardy säl jel şaiqasa, būtaǧy synǧyş, qoparylǧyş keledı. Nu toǧaidyŋ ışınde ūzaq jyldar boiy jaiqalyp, öŋın bermeitın biık şyrşalar da kezdesedı. Olar aptap ystyqqa da, qaqaǧan boranǧa da mız baqpaidy. «MuzArt» toby sondai alyp şyrşa ıspettes. Eŋbektegen baladan eŋkeigen qariiaǧa deiın äsem änderımen elıtıp, köŋılderıne jıbektei jylylyq syilaityn serılerge būqaranyŋ da berer batasy mol şyǧar.
SÜIIKTI ÄNDER ASTANA TÖRINDE ASQAQTAIDY
«MuzArt» tobynyŋ şyǧarmaşylyq keşı aldynda üş änşını äŋgımege tartqan edık.
– Konsertten tyŋdarman köp jaŋalyq kütedı. Şou jasauǧa uäde beresızder me?
SÄKEN: Bız endı aqyl toqtatqan, keiıngı tolqynǧa keŋes beretın jasqa jettık qoi. Oŋdy-soldy sekırıp, sahnany basymyzǧa kötergenımız jaramas. Sondyqtan daŋǧaza şou jasauǧa qūlşynbaimyz. Esesıne mändı, maǧynaly keş ūiymdastyryp, konsertke kelgen är qonaqtyŋ köŋılıne jaǧatyn jaǧymdy änderdı oryndaimyz. Bızdı «MuzArt» vokaldy-instrumentaldy ansamblı men Qazaqstannyŋ eŋbek sıŋırgen öner qairatkerı Aleksandr Abylaevtyŋ jetekşılıgındegı estradalyq-simfoniialyq orkestr süiemeldeidı.
KENJEBEK: Konsertte 4 jaŋa änımız aitylady. Onymen bırge, el esınde qalǧan eskı änderımızdı de şyrqaimyz.
– Mereilı şaranyŋ Astana künımen tūspa-tūs keluı de jauapkerşılık jüktei me?
MEIRAMBEK: Būl oraida elorda äkımdıgınıŋ qoldauy öte zor. Aituly data aiasynda bas şahardyŋ törınde jeke keşımızdı beru – abyroily şarua. Onyŋ üstıne, konsertımız el täuelsızdıgınıŋ 25 jyldyǧy qarsaŋynda ötkelı otyr.
SÄKEN: Astana jūrtşylyǧy asa talǧampaz. Jalpy, qala mädenietınıŋ qandai deŋgeide ekenı bır körgen janǧa belgılı ǧoi. Bärınen būryn şahardaǧy köşelerdıŋ tazalyǧy, ǧimarattardyŋ asqaqtyǧy, adamdardyŋ sypaiylyǧy ūnaidy. Ärine, şet jaqtaǧy audandarda älı de atqarylar ıster barşylyq. Bylaiǧy köpşılık änşılerdı «äuejaidan tüse sala ortalyqqa tartady, tek jyltyr närsenı ǧana köredı» dep oilauy mümkın. Äitkenmen, bız de bärın baǧamdaimyz. Köş jüre tüzeledı demei me qazaq?! Elordamen qatar, özge de qalalardyŋ ädemı ärı körıktı bolǧanyna ne jetsın?!
– Byltyr «Instagram» jelısınde prodiuser Jan Mūqanovpen äzıl-şyny aralas bästeskenderıŋızdı bılemız. «MuzArttyŋ» 15 jyldyq mereitoiynan soŋ şaştaryŋyzdy tyqyrlap alyp tastaityn bolǧan edıŋızder…
SÄKEN: Ony oryndadyq qoi. Negızı būl ideiany şyǧarǧan – Meirambek. Ol 1987 jyldan berı şaşyn tyqyrlap almapty (külıp). Dostar arasyndaǧy jeŋıl qaǧytpa retınde qabyldaŋyzdar. Alaŋsyz, osylai äzıl jarastyryp jürgen qandai jaqsy?!
– Jazda demalasyzdar ma? Älde şyǧarmaşylyq jūmys qyza ma?
KENJEBEK: Äzırge demalys būiyrmaityn siiaqty. Jazda «MuzArt Live» jobasynyŋ basy-qasynda bolamyz. Būiyrsa, būl teleşou 16 jeltoqsanǧa deiın jalǧasady. Aqtyq synnan sürınbegen jıgıtterdı jinap, jaŋa toptyŋ tūsauyn kesemız. Izbasar ınılerımızdı öz jolymyzben baulyp, öner älemıne enuıne mümkındık jasaimyz.
Izdenımpaz toptyŋ ılkımdı ısterıne şyn jürekten sättılık tıledık.
Botagöz MARATQYZY