QAZAQ HANDYǦY Jylqyşylyq däuır jäne memlekettılık bastauy
Söz joq, Qazaq handyǧy HV ǧasyrdyŋ ortasynda paida boldy, bıraq ūltymyzdyŋ memlekettılıgınıŋ negızı eneolit däuırınen bastalady ärı ony alǧaşqy jylqyşy qauymdar qalady. Qazaqtyŋ «Atamyz – Alaş, keregemız – aǧaş» degen sözınde bırneşe myŋjyldyqqa sozylǧan memleket qūru küresınıŋ tarihy jatyr. Jūrttyŋ köbı būl sözdı şyndyqqa eş qisyny kelmeitın ertegı siiaqty köredı. Men Alaş turaly aŋyzdy orta jäne joǧary oqu oryndarynyŋ oqulyqtaryna kırgızuge qanşalyqty küş saldym deseŋızşı. Bızdıŋ halqymyzdyŋ auyz ädebietınde saqtalǧan ertegı siiaqty sözderdıŋ Euraziia tarihyna tıkelei qatysy bar.
Euraziia qūrlyǧynyŋ ortalyq aimaǧyna ornalasqan qazaq jerı köp zaman adamzat balasy üşın kındık territoriia qyzmetın atqardy. Jer men Köktıŋ arasyn qosyp tūrǧan ataqty Şoqterek te osy qazaq dalasynda boldy. Grek äfsanalaryndaǧy Qūdailar panteony, Mysyrdaǧy perǧauyn däuırındegı Künge jäne Osiriske tabynu, tıptı, Şumerdıŋ «Gilgameşı» öz bastauyn bızdıŋ dalamyzda tym erte zamanda paida bolǧan adam, qoǧam, tabiǧat turaly tüsınıkterden bastauyn alady.
Bızdıŋ oiymyzşa, qazaq tarihy Batys jäne Şyǧys örkenietterımen tereŋnen kele jatqan dästürlı ärı jan-jaqty bailanysta qalyptasty. Nemıs filosofy K.Iаspers būl mädeni yqpaldastyqtyŋ tüp-tamyryn otyryqşy mädenietpen bailanystyrady. Onyŋ oiynşa, adamzat mädenietı tek egınşılıkke qolaily audandardyŋ damu jemısı: «Mädeniettıŋ şyqqan ortasy Atlantikadan Tynyq mūhity jaǧalauyna, Europadan Soltüstık Afrika, Aldyŋǧy Aziia, odan Qytai men Ündıstan arasyndaǧy ūlan baitaq jerdıŋ jıŋışke ǧana tılımın qamtidy. Būl ūzyndyǧy barlyq jer betınıŋ ūzyndyǧynyŋ şiregındei ǧana, al enınen jer betınıŋ jiyrmadan bırındei ǧana aimaqta, şölder, dalalar men tau jotalarynyŋ arasyna ornalasqan qūnarly topyraqty territoriia» (Iаspers K., Smysl i naznachenie istorii. /per. s nem./ Mysliteli XX veka. M.,1991, s. 117). Bızdıŋ pıkırımızşe, būl bailanystarǧa arqau bolǧan Euraziia dalalyq aimaǧynda eneolit däuırınde, iaǧni, bızdıŋ jyl sanauymyzdan 4 myŋ jyl būryn paida bolǧan jylqyşylyq tırşılık. Būl qarym-qatynastarda Şyǧys pen Batys örkenietterınıŋ bırqalypty baiau tırşılık yrǧaǧyn būzyp, otyryqşylar ölkelerıne ışkerılei enıp ketetın köşpelı ata-babalarymyzdyŋ qyzmetı erekşe. Qūrylyqtyŋ osy qūnarly bölıgı öte köp zamandar boiy, tıptı, Ūly geografiialyq aşylularǧa deiın baqtaşy halyqtardyŋ baqylauynda boldy.
Qazaqtyŋ auyz ädebietınde erte jylqyşylyq däuır men alǧaşqy jaulap alular köbınese ertegı türınde saqtalǧan. Sonymen bırge keide bır tarihi aŋyzdardan ata-babalarymyzdyŋ älemdı baǧyndyruǧa baǧyttalǧan joiqyn saiahattaryn körgendei bolamyz. Osy sözdıŋ dälelı retınde Jienälı batyrdyŋ hikaiasyn keltıre ketsek oryndy. Būl da qazaqtyŋ köne zamandardan berı közınıŋ qaraşyǧyndai saqtap kele jatqan äfsanalarynyŋ bırı: «Jienälı batyr atasynan qalǧan qara qūl Demektı ertıp alyp, jer jüzın kezgen. «Jüzden asqan Jüzı äulie» degen bar dep, Qara teŋız, Aq teŋız, bes teŋızden ötıp, Jüzı äulienı tapqan.
– Qai jerdı basyp keldıŋder? – degende,
– Syrdariianyŋ ar jaǧasynan keldık, -degende,
– Ua, qu dünie, bız körgende Syr būlaq degen būlaq bar edı, o da dariia bolǧan eken! – deptı.
Ekı közı köruden qalǧan eken. Sonda sonyŋ el-jūrty jylqy degen maldy būryn estıp, körgenı joq eken. Körgenderı tamaşa qylysyp:
– Sondai bır haiuan mınıp kelıptı!- desıp söilesken soŋ, Jüzı äulie ädeiı şyǧyp, sipalap, jal-qūiryǧyn, tört tūiaǧyn, – bärın ūstap körıp aitqan eken:
– Jylqy degen erender,
Jürgen jerı berender.
Tört tūiaǧy bolat-ty,
Jal-qūiryǧy qanat-ty.
Külık. Külık,
Jürgen jerı – ürkın-sürgın, bülıksız bolmaidy. Jetken jerıne zamanaqyr ornatyp jüredı, mūnan jyldam qūtylyŋdar, tūrǧyzbaŋdar, – dep tez qaitaryp jıbergen eken…».
Adamzat köşı bırde mimyrt tırşılıkpen äure bolsa, bırde alasapyran dauyldy bastan keşedı. El men eldıŋ arasy osyndai kezde bır-bırınen alşaqtap, aǧaiyn amal joq bırın-bırı ūmytady. Köşpelı qazaq maŋaiyndaǧy otyryqşy eldıŋ yqpalyna tüskennen keiın dästür-salty da özgere bastaidy.
K.Iаspers erekşe şabyttana sipattaityn siyr tılındei jerde oŋtüstıkten jyljyǧan semit halyqtary men soltüstık-şyǧystan töngen ündıeuropa, altai-oral tıldı halyqtarynyŋ müddelerı bırneşe myŋ jyl taitalasty. Būl tym erte kezeŋ, şyn mänınde, alǧaşqy jylqyşy qauymdardyŋ bas qosyp, tarihtyŋ bastalar kezeŋı, qazaq şejıresınde Alaşa han zamany degen atpen belgılı. Raşid-ad-dinnıŋ «Jämi-at tauarihy» da, Äbılǧazynyŋ «Şadjarat türkısı» de özınıŋ kırıspesın osy Alaşa han zamanynan bastaidy. Raşid-ad-dinge şejıreden aqpar bergen qariialar Alaşa handy Nūq paiǧambarmen zamandas, ne sonyŋ özı dep mejelegen. Osydan-aq semit halyqtary tarihi zamandy Nūq paiǧambardan bastasa, bızdıŋ atalarymyzdyŋ Alaşa handy meje qylǧany körınedı.
Jaratylys älemınen oqşau şyqqan adam balasy üşın käsıptıŋ eŋ tabysty deŋgeiı köşpelı mal şaruaşylyǧymen tyǧyz bailanysty dep esepteimız. Olardyŋ äleumettık damuynyŋ, ruhani qūndylyqtarynyŋ, saiasi tabystarynyŋ özge qoǧamdarǧa tigızgen yqpaly älı de zertteudı qajet etedı. Europa ǧylymy qaşan da adamzat mädenietınıŋ kındık ortasyn bızge jolatpauǧa tyrysady. A.Toinbi «Keibır uaqyttarda olar öz jerlerın tastap, körşı otyryqşy örkenietterdıŋ ielıkterıne basyp-janşyp kıredı…Şapqynşylyqtarymen tarihqa az uaqytqa kırıkse de köşpelı qoǧamdardyŋ öz betınşe tarihy joq» dep sanady (Toinbi A.Dj., Postijenie istorii. – M., 1991, s.186). Fransuz tarihşysy F.Brodel «Kärı qūrylyqtyŋ ortasyndaǧy dalalar men şölderde ömır süretın «varvarlar» örkeniet üşın qauıptı… olardyŋ jaulap alulary adamzat tarihyna alapat serpın bergenımen, būl – parazitizm körınısı» deidı. (Brodel F., Struktury povsednevnosti: vozmojnoe i nevozmojnoe. M., 1986, s.112).
Osylaişa adamzat balasyn alǧa bastaǧan jasampaz tarihymyzdy bırneşe ǧasyr boiy joqqa şyǧarumen ainalysqan Europa ǧylymynda bız tek «Ortalyq Aziianyŋ köşpelı halyqtarynyŋ Qytai, Ündıstan jäne Batys elderıne jetuı (olardan ejelgı dünienıŋ mädenietterı jylqyny paidalanudy üirendı) üş oblysqa da bırdei äser ettı: jylqyny ielengen būl köşpelı halyqtar älem keŋıstıgın tanydy. Olar ejelgı dünienıŋ ūly mädenietterın jaulap aldy. Qiyn-qystau tırşılık, qaterlı joryqtar dünienıŋ jalǧandyǧyn tüsınuge kömektestı, al üstem näsıl esebınde olar būl älemge erlık jäne tragikalyq sanany engızıp, ony epos türınde bıldırdı» degen A.Veberdıŋ pıkırın aqiqi uäj dep bılemız (Veber A., İzbrannoe: Krizis evropeiskoi kultury. Spb.,1999, s.201).
1970-jyldary osy pıkırdıŋ jalǧasyndai bolyp Dj.P.Melloridıŋ «Ündıeuropalyqtardyŋ ata jūrty» degen ataqty eŋbegı jaryq kördı. «150 jyldai ündıeuropalyqtardyŋ atajūrtyn ızdeu barlyq ǧalymdar moiyndaǧandai bır şeşımge äkelmedı… Men olardyŋ eŋbekterınde naqty ata jūrt turaly aitylǧan da bolar dep oilaimyn, sebebı, ony ǧalymdardyŋ ızdemegen jerı joq. Soltüstık poliustan bastap Oŋtüstık poliuske deiın, Atlantika mūhitynan Tynyq mūhitqa deiın atalmaǧan jer joq. Hronologiiasyn da b.z.b. 100000 jyldan bastap b.z.b. 1600-ǧa deiıngı aralyqta ızdedı» dei kele, ol europalyq örkeniettıŋ altyn besıgın qazaq jerınen ızdeudı ūsynady.
A.Veber adamzat balasynyŋ tırşılık mazmūnyn kürt özgertken būl tarihi töŋkerıstı jasaǧan Soltüstık Euraziia dalalarynyŋ jaulap aluşy halyqtary dep eseptedı. Bızdıŋ jyl sanauymyzǧa deiıngı törtınşı myŋjyldyqtan bastap Europa jäne Jerorta teŋızı aimaqtary ündıeuropalyq taipalardyŋ qonystanu jäne yqpal jasau aimaqtaryna ainalsa, ekınşı myŋjyldyqtyŋ ortasynda köşpelı halyqtar Ündıstan men İran jerıne de jettı, al osy myŋjyldyqtyŋ soŋynda Qytai būl köşpelılerdıŋ bilıgın moiyndady. Osy uaqytqa deiın Qytaidan bastap Europaǧa deiıngı aimaqtarda tamyry tereŋge ketken jäne matriarhaldyq salty basym, otyryqşy türde mal asyraǧan, ne egınşılıktı käsıp qylǧan, negızınen özımen-özı, oqşau ömır sürgen köne mädenietter boldy. Aldymen siyr baqqan, keiın jylqyly köşpelılerdıŋ keluımen adamzat tırşılıgı osy ekı küştıŋ arasyndaǧy küreske ainaldy, bır jaǧynan, matriarhaldy, tūraqty, köne, ūiqyly-oiau mädeniet, ekınşı jaǧynan, jaŋa, qozǧalystaǧy, azat oily, özınıŋ damu baǧyty aiqyn köşpelı halyqtar mädenietı. «Köşpelılerdıŋ keluımen adamzat tarihy bastalsa, olardyŋ otyryqşylardy baǧyndyruy barysynda memleket qūryldy» deidı nemıs oişyly.
Euraziia köşpelı taipalarynyŋ memleket qūruşy äleuetı turaly pıkırler erteden bar. F.Ratsel, K.Kautskii, V.Bartold siiaqty osy baǧytta jazǧan europalyq ǧalymdardyŋ ışınde K.Kautskiidıŋ pıkırı erekşe. Ol Euraziialyq nomadtar tarihta qaşanda memleket qūruşy küş retınde qyzmet atqardy, bıraq memlekettı olar öz betımen qūra almauşy edı, memleket qūrudyŋ basty şarty köşpelıler jaulap alyp, baǧyndyratyn momyn ärı eŋbekqor otyryqşylar boluy şart deidı: «Eger bız egınşı şarualar men baqtaşy-nomadtardyŋ psihologiialaryndaǧy: aldyŋǧylardyŋ qarapaiymdylyǧy, sonymen bırge otyryqşylyǧy, qorǧansyzdyǧy, baǧynyştylyǧy, kerısınşe, soŋǧylardyŋ kedeilıgı, jauyngerlıgı, erjürektılıgı, sonymen bırge är mäselege ikemdele alatyn oi qabıletındegı ülken erekşelıkterdı eskersek, onda bız şarualar men baqtaşylardyŋ tırşılıgınen ekı türlı faktordy köremız, damudyŋ belgılı bır fazasynda aralasu barysynda baqtaşylardyŋ şarualardy baǧyndyryp, özderın alym-salyq töleuge mäjbürleitını anyq. Jekelegen baqtaşy taipalar köptegen şarualar qauymdary men aimaqtaryn bırtūtas qylyp jinaqtap, özderı osy qoǧamnyŋ bilıgın qolyna aldy, ony qanaudyŋ barysynda özderı de baqtaşylyq tūrmystan qol üzdı. Osylaişa alǧaşqy memleketter qūryldy» (Kautskii K., Materialisticheskoe ponimanie istorii. M., 1927, s.35 ).
Qyr öŋırı aŋyzdarynyŋ Uyz hanǧa arnalǧan toptamasy köşpelı ordalardyŋ Batys pen Şyǧysqa qarai qozǧalystaryn baqylauǧa mümkındık beredı. Būl ūly jaulap alular men jaŋalyqtar zamany K.Iаsperstıŋ beldık uaqyt turaly tūjyrymdaryna säikes keledı. Jergılıktı mädeniet teoriialaryna qarsy şyǧa otyryp, ol älemdık tarihtyŋ damu barysyna Batys jäne Şyǧystyŋ ruhaniiatyndaǧy kürdelı jaŋalyqtar paida bolǧan özektık jäne ostık (kındık) uaqyt airyqşa qyzmet atqarady degen közqarasty qalyptastyrdy. Ostık uaqyttyŋ basy retınde K.Iаspers b.z.b. 800-200 jyldardy körsetedı. «Būl däuırde qazırgı oi-tanymdarynyŋ negızı salyndy, qazırgı adamdardyŋ ömırınıŋ qūndylyǧyn anyqtaityn düniejüzılık dınder bastau aldy, barlyq baǧytta ämbebaptylyqqa köşu ürdısı jürıp jatty. Adam öz tūrmysyn, özın-özı jäne özınıŋ mümkındıgın tüsındı. Adam aldynda dünie qanşalyqty qorqynyşty ekenı jäne onyŋ tabiǧat aldynda qanşalyqty älsız ekenı aşyldy» (Iаspers K., Smysl i naznachenie istorii. /per. s nem./ Mysliteli XX veka. M.,1991, s.32-33).
Qazaq şejıresıne qarasaq, «Odan soŋ Uyz han qytaidy jäne şürşıttı, sondai-aq taŋǧūtty jeŋıp aldy. Taŋǧūtty täjıkter «tibet» deitın edı. Odan keiın baryp qara qytaidy baǧyndyrdy, ol ülken jūrt edı. Halqynyŋ tüsı ündıler siiaqty qara bolar edı» deidı. Orta ǧasyrlyq şejırelerdıŋ jazba nūsqalaryn ızerlesek, Uyz han eskı qūrlyqty tügel baǧyndyrdy: «basyp alǧan jerlerınde köp jyldar tūryp, dūşpandaryn qūrtyp, dostaryn syilap, «basy Sairam, aiaǧy Mysyrǧa deiıngı uälaiattardyŋ barşasyna äkımder qoiyp, qaityp öz jūrtyna oraldy» (Äbılǧazy, Türık şejıresı. Almaty, 1991., 19-22 bb.).
Qazaq halqynyŋ tarihyn, onyŋ memleket jäne qoǧam qūru fenomenın, adam men dın turaly tüsınıkterın ejelgı tarihty dūrys tüsınbei, qaita qalpyna keltıru mümkın emes. Bız özımızdıŋ būrynǧy eŋbekterımızde Ūly dala tarihynyŋ özındık tamyrlary men qainar közderı bar ekenın jazdyq, ol öte myǧym jäne jarqyn, sonymen qatar Şyǧys pen Batystyŋ tarihymen tyǧyz bailanysty. Ūly dalanyŋ ejelgı otyryqşy örkeniettermen qarym-qatynasyn ärtürlı qainar közder tūrǧysynan qarastyruǧa bolady. Jazbaşa jädıgerler
turaly aitqanda, «Avesta», «Mahabharata», «Veda» siiaqty Ūly daladan tym erterek qonys audarǧan aǧaiyndarymyzdyŋ tūqym-jūraǧaty qaldyrǧan derekterı bar, bıraq tym äfsanalanǧan. Ūly dala men ejelgı örkeniet oşaqtarynyŋ qarym-qatynastary turaly arheologiialyq qazbalar da bırsypyra mälımet berer edı, ökınışke qarai, tabylǧan artefaktılerdı täpsırleu men oi jüiesıne salu jaǧy älı de tömen deŋgeide. Osyǧan bailanysty qazaqtyŋ auyzşa dästürınde saqtalǧan aŋyzdardyŋ maŋyzy erekşe arta tüsedı.
Jambyl ARTYQBAEV,
L.N.Gumilev atyndaǧy
EŪU-dıŋ professory,
tarih ǧylymynyŋ doktory