«Astana» konsert zalynda qalalyq «Saryarqa» halyq muzyka ansamblınıŋ XXI konserttık mausymynyŋ soŋǧy keşı qazaqtyŋ daryndy küişılerınıŋ bırı Qyzdarbek Törebaiūlynyŋ şyǧarmalaryna arnaldy.
Qyzdarbek – Arqadaǧy şertpe küi mektebınıŋ ökılı. Jasynan auyldaǧy ülkenderden dombyra üirenıp, öner soŋyna tüsedı. Ol önerdegı pırı İtaiaq küişını erekşe qadır tūtqan. Tıptı, el ışınde Qyzdarbek öz ūstazy İtaiaqpen, Toqa Şoŋmanūlymen küi jarystyrǧan degen de söz bar. Önertanuşylardyŋ aituynşa, küişınıŋ jeke qorynda 100-ge tarta küi bolǧan. Bıraq onyŋ bärı keiıngı ūrpaqqa tolyq jetken joq. Oǧan sebep te köp. Keŋes ökımetı ornaǧannan keiın otarşyldyq qamytty kigısı kelmegen arqanyŋ däulesker küişılerı azat ruhty aŋsap, «58 statia», «Ötkınşı» degen küiler şyǧardy. Keiın būl şyǧarmalardyŋ avtorlarynyŋ bärı qudalandy. Osyndai auyr azapty Qyzdarbek te kördı.
Keşte belgılı küişı, önertanuşy Janǧali Jüzbaev Qyzdarbektıŋ ūstazy İtaiaqtyŋ «Qosbasaryn» şertıp, aituly küişınıŋ ömırınen az-kem syr aitty.
«Aqseleu Seidımbek aǧamyz öz eŋbegınde Arqanyŋ ataqty küişılerı Qyzdarbek, Sembek, Äbdi, Maqaş, Kärıbek turaly jazdy. Qyzdarbektıŋ küilerın bızge jetkızgen – Däuletbek Säduaqasūly men Oral İsataiūly. Būl kısıler bolmaǧanda küişınıŋ mūrasy eskerusız qalar edı. Äbıken Hasenov közı tırısınde osy jazyqsyz atylyp ketken küişılerdıŋ esımderın atap, şyǧarmalaryn oryndai almady. Būl tüsınıktı de. Qyzdarbek – özı qatarlas küişıler arasynda mahabbat lirikasyna barǧan adam. Onyŋ «Sylqym qyz» atty küiı elge keŋırek taraǧan» dedı ol.
