Äne-mıne degenşe taǧy bır oqu jyly aiaqtalyp qaldy. Endı az künnen keiın oquşylar qyzyqqa toly kanikulǧa şyǧady. Astana qalalyq Bılım basqarmasy balalardyŋ jazǧy demalysyn jarasymdy ötkızuge erekşe nazar audaryp otyr.
Elordalyq bılım basqarmasy jariialaǧan mälımet boiynşa jetkınşekterge arnalǧan jazǧy demalys oryndary qazırden bastap, daiyndyq qamyna kırısken. Balalar üşın barlyq qajettılıktı qamtamasyz etuge äzır dese bolady.
Aitalyq, 6 mausym men 12 tamyz aralyǧynda Aqmola oblysy Aqköl audanynda ornalasqan «Arman» sporttyq-sauyqtyru lagerı 5 auysym boiynşa jūmys ısteidı. Oǧan är auysymǧa 330 bala tartylyp, jalpy, jazǧy uaqytta 1650 oquşy qamtylady dep josparlanuda. Mäselen, bes auysymnyŋ üşeuı tūrmysy tömen jäne köpbalaly otbasylardyŋ balǧyndary men ata-anasy joq balalarǧa jäne osyndai äleumettık toptarǧa arnalyp ūiymdastyrylmaq. Mausymdyq joldamanyŋ qūny 12 künge 32 myŋ teŋgenı qūraidy. Oǧan jol şyǧyndary, bes ret tamaqtanu, mädeni-būqaralyq jäne sporttyq-sauyqtyru şaralary kıredı. Demalys aumaǧynda bassein, sauna jūmys ısteidı.
Sondai-aq, Aqmola oblysynyŋ Ereimentau audanyndaǧy Alǧabas auylynda ırge tepken «Batyr» palatalyq lagerın aituǧa bolady. Ol jerde 14 mausym men 14 şılde aralyǧynda üş auysym boiynşa 375 ata-anasy joq jetkınşekter men az qamtylǧan otbasynan şyqqan balalar tegın demalady. Lager jasöspırımderdı tuǧan jerdıŋ tarihymen tanysyp, tabiǧatty aialauǧa ündeitın taǧylymdyq- tärbielık şaralarǧa baǧyttaidy.
Sonymen bırge 1 mausymnan bastap, 8 şıldege deiın elordalyq 85 mekteptıŋ janynan jazǧy lager aşylyp, üş auysym ışınde 1-4 synypta oqityn 45 000 oquşyny qabyldamaq. Onda balalar tek tamaq üşın ǧana aqy töleidı. Atalǧan lagerdıŋ maqsaty – bastauyş synypta oqityn balalardyŋ şyǧarmaşylyq qabıletın damytyp, salauatty ömır saltyn qalyptastyryp, kanikuldy tamaşa bır äserde ötkızudı közdeidı. «Didarly jaz» dep atalatyn bılım beru ūiymdary janynan qolǧa alynǧan sporttyq-oiyn alaŋdary 1-8 şılde aralyǧynda 5-7 synyptyŋ 4000-nan asa oquşysyn qabyldaidy. Olar tegın qyzmet körsetedı. «Aibyndy mausym» atty äskeri-sporttyq alaŋdary 8-10 synyp oquşylaryna tegın demalys ūiymdastyrmaq. Sondai-aq, 160 balalar üiınıŋ tärbielenuşılerı men ata-ananyŋ qamqorlyǧynsyz qalǧan jasöspırımder Aqmola oblysynda ornalasqan «Borovichok» demalys ornynda sauyǧady.
Astanadaǧy Bauyrjan Momyşūly daŋǧyly boiyndaǧy Oquşylar saraiy janynan 1 mausym men 8 şılde aralyǧynda «Jazǧy demalys akademiiasy» ūiymdastyrylmaq. Onyŋ bır mausymdaǧy (10 kün) qūny 20 myŋ teŋge bolady. Akademiiaǧa qatysu baǧdarlamasynda balalar tamaqtanu, suda jüzu, mūzda syrǧanau, lingvistika sabaqtary, şahmat jäne teatr studiiasyna qatysu sekıldı türlı üiırmelerge jazyla alady. Mahambet Ötemısov atyndaǧy Oquşylar saraiy da 1 mausym jäne 10 şılde aralyǧynda «Şyǧarmaşylyqtyŋ jazǧy mektebı» jobasyn qolǧa alady. Onyŋ da bır mausymdaǧy (10 kün) qūny 20 myŋ teŋgenı qūraidy. İgı şara maqsaty – jetkınşekterdıŋ şyǧarmaşylyq, tanymdyq jäne ziiatkerlık qabıletterın damytyp, öner-bılımge degen qyzyǧuşylyqtaryn arttyru.
Taǧy da kanikul aiasynda mektepter men qosymşa bılım beru ūiymdarynda oqu oşaǧynyŋ aumaǧyn abattandyruǧa baǧyttalǧan kögaldandyru brigadalary, jöndeu brigadalary, intellektualdyq, şyǧarmaşylyq jäne tıl üiırmelerı, respublikalyq jäne halyqaralyq pän olimpiadalaryna qatysu, şyǧarmaşylyq baiqaular jäne sporttyq jarystar ūiymdastyrylady.
Qysqasy, elordalyq oquşylardyŋ jazǧy demalysy şattyqqa toly äserımen, ǧajaiyp sätterımen, äsem körınısterımen este qalmaq.
Azamat ESENJOL
