Astanada Qorqyt atyndaǧy Türkı tıldes memleketterdıŋ dästürlı oryndauşylyq öner festivalı şymyldyǧyn türdı. Qazaq ūlttyq öner universitetınde «Astana – türkı älemınıŋ mädeni astanasy» jyly aiasynda QR Mädeniet jäne aqparat ministrlıgı men Türkiia elşılıgınıŋ «Iýnus Emre» mädeni ortalyǧy osyndai şarany ūiymdastyruǧa mūryndyq bolyp otyr.
Festivalge 60-tan astam dästürlı muzykanyŋ otandyq jäne şeteldık oryndauşylary qatysuǧa niet bıldırgen. Astanadaǧy baiqauǧa qatysuǧa Äzırbaijan, Özbekstan, Qazaqstan, Qyrǧyzstan jäne Qaraqalpaqstan elderınen jas oryndauşylar kelıp otyr. Öitkenı, festivalge 16 men 30 jas aralyǧyndaǧy muzykanttar ǧana qatysa alady. Festival üş nominasiia boiynşa jüredı. Onyŋ alǧaşqysy qobyz, sodan keiın ürmelı jäne ışektı aspaptar, odan keiın «ysqyşty» aspaptar boiynşa üzdık oryndauşylar anyqtalady. Atalmyş baiqaudyŋ basty meimandary, iaǧni qazylar alqasynda QR Kompozitorlar odaǧynyŋ müşesı Edıl Qūsaiynov, QR Eŋbek sıŋırgen ärtısı, professor Meruert Qalenbaeva, QR Mädeniet qairatkerı, qobyzşy Bazarhan Qosbasarov, QR Mädeniet qairatkerı Baiǧara Säduaqasov, Saian Aqmolda, Talǧat Mūqyşev, Qyrǧyzstannan kelgen Jüsıp Aisaev, Äzerbaijannan Lala Guseinova jäne t.b köptegen önerpazdar bar.
«Qobyz» atalymyndaǧy qazylar alqasynyŋ töraǧasy Älquat Qazaqbaevtyŋ aituynşa, Qorqyt atyndaǧy festival Astanada tūŋǧyş ret ötkızılude. Jobanyŋ bır erekşelıgı, mūnda tek dästürlı muzyka ǧana oryndalady. Europalyq äuender kırıktırılmeptı. Basty talap – Qorqyt küilerınıŋ bırın fortepianonyŋ süiemeldeuımen oryndap şyǧu.
«Dästürlı muzykanyŋ oryndauşylary būl oqiǧany köpten berı küttı. Būryndary Qorqyt festivalı basqa qalalarda, negızınen, özge öŋırlerde ötkızılgen. Kelesı jyly būl festivaldı Türkiiada ūiymdastyrudy josparlap otyrmyz», – deidı QR Prezidentı syilyǧynyŋ iegerı Ä.Qazaqbaev.
Onyŋ atap ötkenındei, festivaldıŋ jülde qory 11 mln teŋgenı qūraidy. Laureattardy marapattau jäne festivaldıŋ qorytyndy gala-konsertı bügın Qazaq ūlttyq öner universitetınıŋ Jambyl atyndaǧy konserttık zalynda.
Şynar ÄBILDA
