«Slavian bazary-2016» XXV halyqaralyq öner baiqauynda qazaqstandyq änşı Adam bırınşı oryndy ielendı.
Änşınıŋ kündelıktı än oryndauy bır basqa, sahnada şyrqauy bır basqa bolsa, halyqaralyq jarystarda şaryqtata şyrqauy bölek dünie. Är änşı biık şyŋdardan körınıp, özın-özı jetıldırgısı keledı. Soŋǧy jyldary qazaq estradasynda halyqaralyq baiqaularda biık mınberlerden jüldelı oralyp jürgen talantty änşılerımız köbeiıp keledı. Byltyr elımızdıŋ atynan «Slavian bazary» baiqauyna Dimaş Qūdaibergenov qatysyp, gran-primen oralsa, biyl osy köştıŋ tızbegın jas änşı Adam jalǧastyrdy.
Festivaldıŋ alǧaşqy künı jerlesımız Adam Nikolai Noskovtyŋ «Mınäjat» änın oryndasa, konkurstyŋ finalynda Sem Smittıŋ «I’m Not The Only One» änın şyrqady. Nätijesınde 155 ūpai jinap, belarustyq Aleksei Grossqa ekı ūpai ese jıberıp aldy. Dese de, qazaq elıne ekınşı jeŋıstı äpergen änşınıŋ tabysy otandastarymyzdy zor quanyşqa böledı. Änşı özınıŋ «Instagram» äleumettık jelısındegı paraqşasynda jeŋısın qazaqstandyqtarǧa arnaǧanyn jazǧan bolatyn.
Aita keteiık, «Slavian bazary» baiqauyna 21 elden jas oryndauşy qatysty. Osynşama ükılep qosqan ümıtkerlerdıŋ arasynan suyrylyp şyǧu oŋai şarua emes. Jas änşı būǧan deiın de talai belesterden ötıp, ysylǧan. Aitalyq, Qazaqstan atynan Iýrmalada ötken «Jaŋa tolqyn» baiqauyna qatysyp, besınşı oryn alsa, odan bölek, «SuperStar KZ», «X-Factor» baǧdarlamalaryna da qatysyp, baǧyn synaǧan.
Tyŋdarman talǧamyna qarai öz änşısın ärqaşan ızdep tūrady. Degenmen, ırı baiqaular şyn talanttardy ǧana ırıktep, sahna älemıne joldama beredı. Baiqaǧanymyzdai, qazaq estradasynda Dimaş, Ädemı, Adam sekıldı jaŋa tolqynnyŋ legı qalyptasyp kele jatqanyn aŋǧaru qiyn emes.
Jansaia SYDYQBAI
