Şeteldegı aǧaiyndardy atajūrtqa oraltudaǧy eŋ tamaşa ädısterdıŋ bırı – şeteldegı qazaqtarǧa Qazaqstanda oquǧa mümkındık jasau. Atqarylǧanyna bırneşe jyl bolǧan būl baǧdarlama öte tamaşa nätije berdı. Köptegen jastar oquǧa kelıp, oqu bıtırgenşe osy elge beiımdelıp, QR azamattyǧyn alyp ülgerdı, şaŋyraq köterdı, üilendı, aldy balaly boldy. Botasynyŋ kındıgı osy elge bailanǧan soŋ, köp ötpei äke-şeşesı de Qazaqstanǧa köşıp kelıp jatyr. Demek, būl öte tamaşa joba boldy. Būdan būlai da būl joba jalǧasyn taba beredı degen ümıttemız.
«Qazaqstannyŋ JOO-da bılım aluǧa arnalǧan stipendialdyq baǧdarlama» dep atalatyn būl joba Qazaqstan Respublikasy Bılım jäne ǧylym ministrlıgı bakalavriat, magistratura men PhD doktoranturanyŋ bılım beru baǧdarlamalary boiynşa bızdıŋ eldıŋ JOO-da bılım alu üşın şetel azamaty, onyŋ ışınde Qazaqstan Respublikasynyŋ azamattary bolyp tabylmaityn qazaq ūltynyŋ tūlǧalaryn şaqyrudy maqsat etken. Aty men maqsaty aityp tūrǧandai, būl şeteldegı bılım quǧan jastardy Otanǧa şaqyrudaǧy öte keremet baǧdarlama boldy. Degenmen, osy jobaǧa biyl bıraz özgerıs engızılıptı. Atap aitqanda, Magistratura bılım beru baǧdarlamasy boiynşa biyldan bastap şet tılın bıludı rastaityn halyqaralyq sertifikat talap etılgen. Ärine, būl dūrys ta şyǧar, bıraq bızdıŋşe, būl şartty qazırşe qataŋ qaǧida etıp ūstanuǧa älı erte siiaqty. Esesıne memleket tılınen, iaǧni qazaq tılınen emtihan alsa oryndy sekıldı. Mäselen, Qytai men Moŋǧoliiadan keletın qazaqtardyŋ bakalavriat bıtırgenderınıŋ kez kelgenı aǧylşyn tılınen IELTS Academic-ten kemınde 5,5 ball jinai almaidy, qytai, moŋǧol tılderınde oqyǧan olardyŋ köbınıŋ aǧylşyn tılı sauat aşu deŋgeiınde ǧana. Demek, būl Qazaqstanǧa kelıp oqysam, bılım alsam degen keibır qandastarǧa kedergı jasauy mümkın. Al qazaq tılınen öte almasa, onda özınıŋ sorynan körsın deuge bolady. Osy baǧdarlamamen kelıp (aǧylşyn tılın talap etpegen kezde), oqyp, qazır elımızde jaqsy jūmys ıstep jatqan azamattar da az emes. Endı ony da köpsınıp, alystan kelem degen aǧaiynnyŋ aldyna aǧylşyn tılın asa almas asu etıp qoimaiyq, aǧaiyn. Bır qazaq bolsa da, bauyrymyzǧa tartudyŋ jolyn ızdeiık.
