Elordany su alyp ketpes üşın onyŋ maŋaiy ǧaryştan täulık boiy baqylanyp otyr. «Qazaqstan Ǧaryş Sapary» kompaniiasy mamandary jerdı qaşyqtyqtan baqylaityn qazaqstandyq sputniktıŋ soŋǧy mälımetterın ūdaiy jariialap keledı.
Mamandar Astananyŋ maŋaiyndaǧy eldı mekenderde erıgen qar suynyŋ deŋgeiın, kölemın kündız-tünı qadaǧalap otyr. Būl su basu qaupı tuyndaǧanda aldyn alu şaralaryn ūiymdastyryp, tūrǧyndardy qauıpsız jerge köşırıp ülgeruge ülken mümkındık ekenı sözsız. Aitalyq, Aqmola oblysy äkımdıgınıŋ baspasöz qyzmetınıŋ taratqan mälımetı boiynşa, Aǧanas auylyndaǧy 147 adam qarǧyn qaupıne bailanysty basqa jerge köşırılgen. Bügınde būl aumaqta täulık boiy arnaiy ştab jūmys ıstep, arnaiy tehnikalar jūmyldyryldy.
Al ǧaryştan tüsırılgen suretterge baqylau jürgızgen mamandar Taitöbe auylyna da su jüru yqtimaldylyǧyn anyqtaǧan. Osyǧan bailanysty tılsız jauǧa qarsy jedel şaralar qolǧa alynyp, bırden 8 myŋ tekşe metr erıgen su sorǧyzylǧan. Būǧan qosa, auyldyŋ sudan qorǧap tūrǧan bögetke 830 qap topyraq tögılıp, 4 myŋ qap qūm qūiylǧan.
Sputnikten tüsırılgen suretterden Qosşy auylynyŋ oŋtüstıgınde qar suyn böget ūstap tūrǧanyn köruge bolady. Eger su onyŋ erneuınen asyp ketetın bolsa, tasqyn su bırden Astanaǧa aǧylady. Bıraq būl jaǧdai da jıtı baqylauda tūr. Qosşynyŋ oŋtüstık tūsyna sudy ūstap tūratyn qondyrǧylardyŋ ırgesın bekıtu jūmystary jürgızılude. Bügınde būl maŋaiǧa ūzyndyǧy 600 metrlık 1050 qap töseldı.
Astananyŋ ırgesındegı Qyzyljar auylynyŋ bögetı de bekemdelıp, onda 950 qap inerttık material tögıldı.
Aqmola oblysy äkımdıgınıŋ baspasöz qyzmetınıŋ mälımetı boiynşa, Selinograd audanyna qarasty 11 eldı mekennıŋ bärınde tasqynǧa tosqyn qoiu şaralary jedel jürgızılıp jatyr. Mūnyŋ barlyǧy – Astananyŋ aumaǧyndaǧy mekender. Keibır auyldardyŋ bögetıne qosymşa qūrylystar jürgızılıp, jylǧa, aryq qazylypty. Audan boiynşa barlyǧy 523 adam qauıpsız jerge köşırılgen.
Qymbat NŪRǦALİ
