Astana qalasy Tūtynuşylardyŋ qūqyqtaryn qorǧau departamentı «Halyqtyŋ tamaq qauıpsızdıgın qamtamasyz etude memlekettık organdarmen käsıpkerlerdıŋ bırlesıp jūmys ısteuı» atty taqyrypta «döŋgelek üstel» ötkızdı.
Osy soŋǧy bır-ekı ai kölemınde qala tūrǧyndarynyŋ köpşılık jiı auqattanatyn oryndarda tamaqtan ulanu oqiǧalary kezdestı. Sondyqtan, atalǧan jaǧdai bügıngı taŋda özektı mäselege ainalyp, köpşılıktı alaŋdatyp otyrǧany ras. Ärı syrttan keletın tamaq önımderınıŋ keibır türlerınıŋ sapasyzdyǧy da syn kötermeidı. Jiynǧa qatysqan jauapty mamandar da osy töŋırekte oi qozǧap, jeke käsıpkerlermen bırlese otyryp, osyndai keleŋsız jaǧdailar taǧy qaitalanbauy üşın, onyŋ aldyn aludyŋ tiımdı joldary qandai bolmaq degen
tarapta äŋgıme örbıttı. Tızgındı joǧaryda atalǧan departamenttıŋ direktory Nūrlybek Asylbekov özı alyp, jürgızıp otyrdy.
– Bügıngı bız halyq tūtynatyn tamaqtyŋ sapasy men onyŋ qauıpsızdıgın qamtamasyz etu mäselelerın talqylau üşın jinaldyq. Öitkenı, osy keleŋsız jaǧdaiǧa qala tūrǧyndary qatty alaŋdauly. Ol tüsınıktı. Sondyqtan bärımız bırlesıp, tüiındı mäselenıŋ jauabyn ızdesek deimız, – dedı jinalǧandardy sözge tarta söilegen mekeme basşysy.
Odan keiın söz alǧan QR Ūlttyq ekonomika ministrlıgınıŋ ökılı Maral Rahymjanova da osy mäsele turaly öz oiyn sabaqtap öttı. Atalmyş departament direktorynyŋ orynbasary Sarhat Beisenova qaladaǧy sanitarlyq-epidemiologiialyq jaǧdaiy jaiynda baiandama jasady. Äsırese, «Astana ekspertiza» JŞS-nıŋ jetekşısı Tatiana Kononova: «Köbınese syrttan keletın keibır tamaq önımderınıŋ sapasyzdyǧy qynjyltady. Köterme saudamen ainalysatyn nüktelerdegı tamaq önımderıne mūqiiat bolǧan jön. Ärine, olardy da tüsınu kerek. Degenmen, halyq tūtynatyn azyq-tülık önımderıne qataŋ qadaǧalau qajet. Mäselen, Mäskeu qalasynda osy baqylau şarasy tiımdı jolǧa qoiylǧan. Ol jerde tamaq önımderın satatyn sauda nüktelerı aitylǧan eskertpelerdı ıske asyrmasa, qataŋ şara qoldanuǧa deiın barady. Mümkın, bızge osyndai talaptar qajet şyǧar» dep, öz oiyn bır tiianaqtady. Sondai-aq, «döŋgelek üstel» basyndaǧy kezdesude elordanyŋ satu nysandarynda sanitarlyq-epidemiologiialyq qadaǧalauǧa jatatyn tauarlarǧa qoiylatyn talaptar men tiıstı zaŋnamaǧa säikes kelmeitın tamaq önımderın satu faktılerı töŋıregınde de söz boldy.
Azamat ESENJOL
