Astana qalasynda köşege tükırgen tūrǧyn jazaǧa tartyldy.
Oqiǧa 29 şılde künı künı bolǧan. Astana qalasynyŋ 27 jastaǧy bır tūrǧyny vokzal aumaǧyndaǧy subūrqaqtyŋ maŋaiynan ötıp bara jatyp tükıre salǧan. Jas äieldıŋ būl qylyǧyn ersı körgen tūrǧyndardyŋ bırı polisiiaǧa habar beredı. Bügınde tärtıp būzuşyǧa qatysty äkımşılık ıs qozǧalyp, 14 847 teŋge kölemınde aiyppūl salyndy. «Astanada qylmysqa jol joq. Tıpten ūsaq zaŋ būzuşylarǧa da aiauşylyq jasalmaidy. Temır jol vokzaly adam köp şoǧyrlanatyn oryn ǧana emes – elordanyŋ qaqpasy. Elımızdıŋ bas şaharyna kelgen ärbır adamnyŋ alǧaşqy äserlerı osy jerden bastalady. Tärtıp būzuşylyqqa jol bermei, qala tūrǧyndary men qonaqtarynyŋ qauıpsızdıgın qamtamasyz etu barysynda köpşılık oryndarynda terıs qylyqtar körsetıp, tärtıp būzǧandardy da nazardan tys qaldyrmaimyz. Osy maqsatta elordada «nöldık tözımdılık» ūstanymyn qalyptastyru maqsatynda jūmystar jürgızılıp jatyr» deidı Astana qalalyq mamandandyrylǧan audanaralyq äkımşılık sotynyŋ sudiasy Äigerım Säduaqasova. Būl rette Astana qalasynyŋ äkımı Äset İsekeşev te bas qalada barlyq qūqyq būzuşylyqqa «nöldık tözımdılık» tanytu qajettılıgın basa aitqan bolatyn.
Zaŋ būzuşylyq demekşı, soŋǧy jyldary Astana qalasynda qylmystyq ahual jaqsaryp keledı. IID mamandarynyŋ mälımetıne sensek, jan-jaqty jürgızılgen şaralardyŋ nätijesınde jeŋıl qylmystar azaiyp, alaiaqtyq körsetkışı 3,7, būzaqylyq – 46,9, sondai-aq, kölıktı aidap ketu sekıldı jaman ädetter 11,8 paiyzǧa tömendegen.
Qylmystyŋ aldyn alu jäne aşu prosesınde de oŋ dinamika baiqalyp, auyr jäne asa auyr qylmystardy aşu byltyrǧy jylmen salystyrǧanda edäuır jaqsarǧan. Bırınşı jartyjyldyqtyŋ qorytyndysy boiynşa profilaktikalyq jūmystardy küşeitudıŋ nätijesınde tärtıp saqşylary qylmystardyŋ azaiuyna bırşama qol jetkızıp otyr. Iаǧni, tonau 47,2 paiyzǧa, päter ūrlyǧy 4,8, būzaqylyq 49,1 paiyzǧa azaiǧan.
«Işkı ıster organdarynyŋ qyzmetındegı negızgı mındetterdıŋ bırı naşaqorlyqpen küresu bolyp tabylady. Osy baǧytta bırqatar jūmystar jürıp jatyr. Jyl basynan berı 154 esırtkı qylmysy anyqtalyp, zaŋsyz ainalymnan 230 kg şamasynda esırtkı alyndy. Onyŋ 14 kelıge juyǧy – geroin. Taǧy 202 kg marihuana men 14 kelıden astam gaşiş tärkılendı. Osy jyldyŋ alty aiy ışınde 11 «jeŋgetai» qylmystyq jauapkerşılıkke tartyldy» deidı Astana qalasy IID baspasöz qyzmetınıŋ jetekşısı Sofiia Qylyşbekova.
Bürkıt NŪRASYL
