Elımızde düniejüzılık tuberkulezge qarsy küres künıne arnalǧan ıs-şaralar ūiymdastyrylu josparlanyp otyr. Būl turaly QR Prezidentı janyndaǧy ortalyq kommunikasiialar qyzmetınıŋ resmi ökılı Altai Äbibullaev mälımdedı.
Onyŋ aituynşa, QR Densaulyq saqtau ministrlıgı 24 nauryzda oblys äkımdıkterımen bırlesıp Düniejüzılık tuberkulezge qarsy küres künıne arnalǧan ıs-şaralar ötkızuge niettı. Sondai-aq, ökpe auruyna qarsy küres Düniejüzılık densaulyq saqtau ūiymymen bırlese otyryp, «Äzırge tırı tūrǧanymda, tuberkulezdı toqtatyŋdar!» atty bastamany jüzege asyrmaq.
– Tuberkulezge qarsy küres densaulyq saqtau salasyndaǧy memlekettık saiasattyŋ asa maŋyzdy baǧyty bolyp tabylady. Būl salada problema joq emes. Soŋǧy 5 jylda ökpe auruyna şaldyqqan adamdardyŋ sany 34,9 paiyzǧa, osy derttıŋ saldarynan ölım deŋgeiı 57,4 paiyzǧa tömendep otyr, – dedı A.Äbibullaev.
Ainūr ŞOŞAEVA
