Astanada qalalyq mäslihattyŋ deputattary qoǧamdyq tyŋdau ötkızdı. Jiyndy qalalyq mäslihattyŋ hatşysy Sansyzbai Esılov aşyp, kün tärtıbımen tanystyrdy.
Bügınde qalada qūrylys jūmystary men ortalyqty abattandyru jūmystarynan basqa, şet aimaqtardy damytu qolǧa alynǧan. Osy maqsatta 2010 jyly Astana qalasynyŋ şet aimaqtaryn damytu tūjyrymdamasy jüzege asyryla bastady. Qūjat boiynşa joldar men injenerlık jelılerdı salu, sonymen qatar, tūrǧyn alaptarynda adamdarǧa qolaily jaǧdai jasau qarastyrylǧan.
Osy maqsatta, 150 myŋǧa juyq halyq tūratyn jiyrma tūrǧyn alap jöndeledı. «Bügıngı taŋda 232 km jol salyndy. 2011-2013 jyldary on bes tūrǧyn alapta tiıstı jūmystar qarqyndy jürgızılıp, 65,3 km jol men 136 km injenerlık jelı jaŋadan salynǧan bolatyn. Bes tūrǧyn üi alabynda jūmystar tolyǧymen aiaqtaldy» deidı Astana qalasy Jolauşylar kölıgı jäne avtomobil joldary basqarmasynyŋ basşysy Raşid Amanjolov.
Sonymen qatar, Astanada 2020 jylǧa deiın Oŋtüstık-Şyǧys audanynyŋ infraqūrylymyn jabdyqtau közdelıp otyr. Būl turaly Astana qalasy kommunaldy şaruaşylyq basqarmasynyŋ basşysy Pavel Kulagin aitty.
«Qazır 600 tūrǧyn üi tolyqtai kommunaldyq jelılermen qamtamasyz etıldı. 2011-2012 jyldary Astananyŋ şetkerı aimaqtaryn damytu tūjyrymdamasy aiasynda Komsomolskii, Qaraötkel, Zarechnyi audandarynda jūmys jürgızıldı» dedı ol.
Erkejan SÄTIMBEK
