Keşe elorda äkımdıgınıŋ janyndaǧy «Astana» konsert zalynda qala tūrǧyndaryn qabyldau künı öttı. Būl jiynnyŋ erekşelıgı sol, kez kelgen azamat kırıp, kökeiınde jürgen saualdaryna jauap ala aldy.
Audan äkımdıkterı, türlı basqarmalar men ūiymdardyŋ ökılderı qatysqan ıs-şarada bırneşe mekemenıŋ müşelerıne jügınıp, öz saualdarymyzdy qoidyq.
Jaqynda bes balasynan bır tünde aiyrylyp, qara jamylǧan otbasynyŋ jaiy bükıl Qazaqstandy jylatty. Osy maqsatta qazır qandai şaralar qoldanyp jatqany köpşılıktı qyzyqtyrǧany anyq. Osyny bılmek maqsatynda Astana qalasynyŋ Tötenşe jaǧdailar departamentı jaiǧasqan orynǧa qarai aiaŋdadyq.
– Şynyn aitu kerek, bız josparmen jūmys ıstep kelemız. Ärbır jylu beru mausymynda, odan bölek künara tūrǧyn üi sektorlaryn aralap, tekserıp şyǧu nazardan tys qalǧan emes. Al jaqynda köpbalaly nemese jaǧdaiy tömen otbasylarǧa qauıpsızdık maqsatynda uly gazdy anyqtaityn qūrylǧy ornatu bastaldy. Bügınge deiın 23 datchik ornatylsa, älı onyŋ 90-yn ornatu josparda bar, – deidı atalǧan departamenttıŋ aldyn alu bölımınıŋ aǧa injenerı Bekbolat Orazhanūly.
«Baiqoŋyrdaǧy» balabaqşa jaiy
Osydan keiın Baiqoŋyr audany äkımdıgınıŋ müşelerı ornalasqan orynǧa qarai jaqyndap, balabaqşa jaiyn qozǧadyq. Belgılı bolǧandai, byltyr ǧana qūrylǧan jaŋa audanda bas-aiaǧy 18 memlekettık balabaqşa bolsa, onyŋ 6-uy jöndeu jūmystaryn jürgızudı talap etedı eken. Küzge deiın ekeuı jaŋǧyrtylmaq. Alaida memlekettık balabaqşa aşu biylǧy josparda joq körınedı. Esesıne būl mäsele audandaǧy 13 jekemenşık balabaqşa arqyly rettelıp jatyr eken.
Qorşaǧan ortany qorǧau
Elordadaǧy körıktı jerlerdıŋ bırı – Aqbūlaq özenı jazdygünı baqanyŋ kölşıgındei jap-jasyl bolatyn sätterı jiı kezdesedı. Mūnyŋ syryn bılmek maqsatynda Qorşaǧan ortany qorǧau jäne tabiǧatty paidalanu basqarmasynyŋ qyzmetkerlerıne jügıngen edık, būl Aqbūlaqtyŋ kei tūstary taiazdanyp, asty baldyr men topyraqqa tolyp ketkennen kün ystyqta bolady eken. Būl mäsele qazır pysyqtalyp, smetalyq qūjattary äzırlenıptı. Tiıstı qarjy bölınse, biyldan bastap tūraqty tazalau jūmystary qolǧa alynady.
Būdan bölek, qaladaǧy aǧaş jaiy da qozǧaldy. Mäselen, qalanyŋ körkın arttyryp tūrǧan aǧaşty eş sebepsız keskenı üşın 50 AEK kölemınde aiyppūl salynsa, qosymşa öteuı retınde 5 aǧaş otyrǧyzu mındetteledı eken. Būl bız qyzyqtyrǧan sūraqtardyŋ jauaby boldy.
