Elımızge älemge äigılı tennisşı Rafael Nadal keldı. Qazaqstan tennis federasiiasynyŋ şaqyrtuyn qabyl alǧan «Ülken şlem» turnirınıŋ 14 dürkın jeŋımpazy Astanada bırqatar ıs-şaraǧa qatysty. İspan sportşysymen bırge tanymal fransuz tennisşısı Jo-Vilfrid Tsonga da bızdıŋ topyraqqa taban tıredı.
24 künı Astanaǧa jetken olimpiada chempiony aldymen «Team Kazakhstan» akademiiasynyŋ talantty jastaryna şeberlık sabaǧyn ötkızıp, kelesı künı Nazarbaev universitetınde jurnalisterge arnap baspasöz mäslihatyn ötkızdı. Sodan keiın universitettıŋ studentterımen kezdesıp, jastardyŋ sūraqtaryna jauap berdı.
«Men Qazaqstan tennis federasiiasynyŋ prezidentınen şaqyru alǧanda, köp oilanbastan kelısım berdım. Būl – Qazaqstanǧa alǧaşqy saparym. Sızdıŋ elge kelgenıme öte quanyştymyn. Qazaqstanda ülken tennistı damytu maqsatynda ūiymdastyrylyp otyrǧan şara – janküierler men jas tennisşıler üşın baǧasy joq mümkındık» dedı Nadal.
Al basty şara 25 qyrküiek künı saǧat 19:00-de Ūlttyq tennis ortalyǧynda öttı. Oǧan deiın Memleket basşysy qos sportşyny arnaiy qabyldap, kezdesu aldynda äigılı tennisşılerdıŋ sapary elımızdegı tennistıŋ būdan ärı damuy üşın maŋyzdy röl atqaratynyna senım bıldırdı.
«Būl – qazaqstandyq jas sportşylar üşın ülken uaqiǧa. Sızder olarǧa özderıŋızben oinau mümkındıgın berdıŋızder. Būl olardy aitarlyqtai yntalandyru bolyp sanalady. Sondai-aq, sızder bızdıŋ elımızge kelıp, elordanyŋ aituly nysandaryn köru mümkındıgıne ie boldyŋyzdar» dedı Qazaqstan Prezidentı Nūrsūltan Nazarbaev.
Osydan keiın Elbasy Rafael Nadal men Jo-Vilfrid Tsonga arasyndaǧy tennis matchyn tamaşalady.
Nūrislam QŪSPANǦALİ
