QR Ūlttyq muzeiı tūŋǧyş ret ūiymdastyrǧan «Ūlttyq mūra» atty avtoşeru märesıne jettı.
Osyǧan bailanysty ötken baspasöz mäslihatynda söz söilegen muzei direktory Darhan Myŋbai būl avtoşeru ǧylymi-zertteu jūmystarynyŋ basy ekenın atap öttı.
Jaqynda Ūlttyq muzei ǧylymi-zertteu jūmystaryn jürgızuge rūqsat beretın memlekettık lisenziia men ǧylymi baiqaularǧa qatysuǧa jol aşatyn arnaiy kuälıkke qol jetkızıptı. Direktordyŋ aituynşa, endı muzei ūjymy elımızdegı ırı ǧylymi-zertteu ortalyǧyn qūrudy josparlap otyr.
Astana künı qarsaŋynda aşylǧan respublikamyzdaǧy ırı mädeni oşaq jönındegı aqparat jūrtşylyqqa jetuı kerek. Avtoşeru ūiymdastyrudyŋ basty sebebı de osynda. «Qūramynda ǧalymdar men muzei qyzmetkerlerı bar avtoşeru aimaqtarda Ūlttyq muzei qoryna bıregei mädeni jädıgerlerdı ötkızu jönınde aqparattyq nasihat jūmystaryn jürgızıp qana qoimai, özge öŋırlerdegı muzei qyzmetkerlerınıŋ ūsynys-tılegın qaǧazǧa tüsırıp qaitty» dedı Darhan Myŋbai.
Baspasöz mäslihatyna qatysqan mūrapaly toptyŋ müşesı, belgılı ǧalym Jambyl Artyqbaev aldaǧy avtoşeruler ǧylymi-zertteu sipatyna ie bolatynyna senım bıldıre kele, oǧan arheologtar men etnograftardy da jūmyldyru qajettıgın jetkızdı.
«Mädeni mūra» baǧdarlamasynyŋ qabyldanǧanyna 10 jyl toluyna jäne Ūlttyq muzeidıŋ aşyluyna orai ūiymdastyrylǧan avtoşeru būl jolǧy saparda Almaty – Taraz – Şymkent – Türkıstan – Qyzylorda – Jezqazǧan – Qostanai – Kökşetau – Astana baǧytyndaǧy mädeni-tarihi nysandardy aralap, ortalyq jäne oŋtüstık aimaqtardyŋ muzeilerınde boldy.
Ūlttyq muzeidıŋ jobasy aldaǧy 3 jylǧa josparlanǧan. 2015-2016 jyldary avtoşeruşıler elımızdıŋ Şyǧys, Batys, Soltüstık aimaqtaryn aralamaq.
Qymbat NŪRǦALİ
