ŪLYLYQ ŞYŊY – ŪSTAZDYQ
Astana qalasynyŋ äkımı İmanǧali Tasmaǧambetov«Jyl ūstazy – 2014» qalalyq baiqauynyŋ Gran-pri iegerı – №4 mektep-gimnaziianyŋ qazaq tılı men ädebietı pänınıŋ mūǧalımı Sailaugül Qarşyǧaǧa jeŋıl avtokölıktıŋ kıltın tabys ettı.
Keşe «Kongress holl» saraiynda jyldaǧy qalyptasqan dästür boiynşa Astana qalasynyŋ eŋ taŋdauly bılım ūiymdary men mūǧalımderı marapattaldy.
Ūstaz – ūly tūlǧa. Bügıngı mereilı merekesınde olarǧa arnap qanşa jyly sözder aitsaq ta, artyqtyq etpeidı. Özgenıŋ balasyn öz balasyndai körıp, şäkırtınıŋ boiyna bılım närımen qatar, ömırdıŋ ūlaǧatyn da sıŋıre bıletın osy aiauly jandar qandai qūrmetke de laiyq. Mıne, zäulım ǧimarat sahnasyndaǧy jyly lebızdermen, ystyq yqylastar solarǧa arnaldy.
Töl merekesıne şalqar peiıl, şadyman köŋıl-küimen kelgen ūstazdardy Qazaqstan Respublikasynyŋ Bılım jäne ǧylym vise-ministrı Tahir Balyqbaev, Qazaqstan Respublikasy Parlamentı Senatynyŋ deputaty V.Redkokaşin, Qazaqstan Respublikasy Parlamentı Mäjılısınıŋ deputaty Ä.Bimendina qūttyqtady.
Biyl «Üzdık mektep – 2014» qūrmettı ataǧyn №60 mektep-lisei ielendı. Olarǧa «Astana – bäiterek» kubogy men 16 million teŋgenıŋ sertifikaty tabys etıldı. Ärı osy bılım mekemesınıŋ oqu-tärbie jūmysynda jetıstıkke jetken on üzdık mūǧalımnıŋ eŋbekaqysyna elu paiyz üsteme taǧaiyndaldy.
Al, «Üzdık balabaqşa» atalymyna №64 «Asyl böbek» balabaqşasy ie boldy. Sondai-aq, biylǧy bäigede Käsıptık-tehnikalyq kolledjdıŋ, qosymşa bılım mekemelerı arasynda Oquşylar saraiy jäne arnauly bılım mekemelerı arasynda №2 Oŋaltu ortalyǧynyŋ mereiı ösıp, üzdık tanyldy.
Odan keiın «Üzdık sait» atalymy boiynşa marapattauda I oryn – №3 mektep-gimnaziiaǧa, II oryn – №18 orta mektepke, III oryn – №40 orta mektepke būiyrdy. Olardyŋ barlyǧy da Astana qalasy äkımınıŋ diplomymen marapattaldy.
Ūstazdarǧa saltanatty qūrmet körsetu räsımıne pedagogikalyq eŋbek ardagerlerı, bılım beru ūiymynyŋ basşylary men qoǧamdyq ūiym ökılderı qatysty.
Merekelık şara aiasynda Qairat Nūrtas, Marjan Arapbaeva, «MuzArt» triosy, «Boicekz» kvartetı, «Zet» triosy syndy tanymal estrada änşılerı men Oquşylar saraiynyŋ şyǧarmaşylyq ūjymdary qatysqan konsert barşaǧa merekelık köŋıl-küi syilady.
Alǧaş älıppenıŋ betın aşyp, ärıp tanytqan, ömırdıŋ qyr-syryn bıluge qūştar etıp, şäkırtınıŋ jan düniesıne nūrly şuaq sebetın, adamgerşılıkke baulityn jandar turaly ärıptesterınıŋ lebızderın de bıldık.
Baqytgül Molşylyqqyzy, qaladaǧy №41 «Baldyrǧan» balabaqşasynyŋ ädıskerı:
– Barlyq ärıptesterımdı bügıngı töl merekelerımen şyn jürekten qūttyqtaimyn! Qazır qalada balabaqşalarǧa barlyq jaǧdai jasalyp otyr. Menı mūndaǧy qyzmetkerlerdıŋ eŋbekqorlyǧy erekşe süisındıredı. Bızge täuelsız memlekettıŋ bolaşaq azamattaryn tärbieleuden artyq qandai baqyt bar?
Mahmūt Tuliakov, №40 orta mekteptıŋ dene şynyqtyru pänınıŋ mūǧalımı:
– Kezınde Ahmet Baitūrsynūly: «Jaqsy mūǧalım mektepke jan kırgızedı, basqa kemşılıgı bolsa, mūǧalımnıŋ jaqsylyǧy jabady, bıldırmeidı» deptı. Mynandai jahandanu zamanynda kezdesetın qiyndyqtarǧa qaramastan, balalarmen jūmys ısteu tek öz ısın jete süigen mamandardyŋ qolynan keledı desem, artyq aitpaimyn. Sondyqtan, mūǧalımderge bügıngı körsetılıp jatqan qūrmet pen marapat öte oryndy dep esepteimın.
Taŋatar TÖLEUǦALİEV