Jambyl öŋırınıŋ diqandarynyŋ berekelı qolymen ösırılgen alma, almūrt, jüzım, baqşa önımderı, keptırılgen örık-meiız, jaŋǧaqtar astanalyqtardyŋ dastarhanyna jettı. Oblystyŋ auylşaruaşylyq önımderınıŋ järmeŋkesıne jinalǧan jūrt köp boldy. 60 mln. teŋge şamasyndaǧy somany qūraityn soqtaly tauarlar kün qaraiǧanǧa deiın satylyp ta kettı.
«Järmeŋkege oblystyŋ jetı audany jäne Taraz qalasynyŋ käsıpkerlerı 17 mäşinege tiep azyq-tülıktıŋ barlyq türlerın äkeldık. Onyŋ ışınde 145 tonna kökönıs, 28 tonnaǧa juyq et, 6 tonna et-süt önımderı, 2 tonna balyq, 13 tonna bal, keptırılgen jemıs bar» – dedı Jambyl oblysy äkımınıŋ orynbasary Mūratbai Joldasbaev.
Baǧany saraptai kelgenımızde, jambyldyqtar alyp kelgen önımderdıŋ baǧasy Astana bazarlarynan 20 paiyzǧa arzan eken. Būl öte qolaily ärı astanalyqtardyŋ qystyŋ azyq-tülık qoryn jasap aluyna zor mümkındık beredı. Mūndai järmeŋkenı oblys tauarlarynyŋ jarnamasy deuge de bolady. Astana qalalyq mäslihatynyŋ hatşysy Sansyzbai Esılov järmeŋke kezınde jurnalisterge bergen sūhbatynda, är öŋırden kelıp jatqan osyndai järmeŋkelerdıŋ jaqsy dästürge ainalǧandyǧyn jäne ol käsıpkerlerge de, elorda tūrǧyndaryna da tiımdı ekenın atap öttı.
«Mūndai järmeŋkeler dästürlı türde ötıp keledı. Elımızdıŋ oblystary öz auylşaruaşylyǧy tauarlary men önımderın äkeledı. Mūndaǧy maqsat-mındet tek satu, sauda jasau ǧana emes, öz önımderın äkeluşıler men elorda tūrǧyndary üşın tiımdı şart jasau» – dedı mäslihat hatşysy.
Aigül UAISOVA
