Bügın – bärımız asyǧa kütken 22-şı Respublikalyq «Jas qanat»-2013 jas oryndauşylar baiqauynyŋ naǧyz tartysty kezeŋı ötetın kün. Elordanyŋ Beibıtşılık jäne kelısım saraiynda jalǧasyn tauyp jatqan būl dübırlı dodany jyldaǧy dästür boiynşa Mädeniet jäne aqparat ministrlıgı, Astana qalasynyŋ äkımdıgı jäne «Aziia dauysy» direksiiasy ūiymdastyryp otyrǧandyǧyn eskerte keteiık.
Jalpy, Almaty qalasynda 1992 jyldan berı ötkızılıp kelgen jas talanttarǧa qoldau körsetetın memlekettık joba 2001 jyldan bastap elorda törınde jalǧasuda. Onyŋ altyn, kümis, qola qanatynyŋ iegerleri soŋǧy şeşuşı künı anyqtalyp, Astana kögınde taǧy üş önerlı jūldyz jarqyraityn bolady. Qazır osy «Jas qanat» jeŋımpazdaryna keremet syi müsının jasap şyqqan zerger de belgılı boldy. Ol – Almaty qalasy Oral Taŋsyqbaev atyndaǧy Respublikalyq sändık-qoldanbaly öner kolledjınıŋ 3-kurs studentı Aitjan Tūrlyǧazy degen azamat.
«Oqu üderısı jürıp jatqan kezde maǧan «Jas qanat» jeŋımpazdaryna «Qanat» müsının jasau ūsynysy tüsken bolatyn.
Būl – respublikalyq jas oryndauşylardyŋ baiqauy bolǧandyqtan, men de bır ırı jobaǧa öz ülesımdı qosaiyn dep, bırden jūmysqa kırısıp kettım. Sondyqtan, ol men üşın jauapkerşılıktı ıs boldy desem, qatelespespın» deidı şeberdıŋ özı.
Sonymen, mausymnyŋ 3-ı künı bas qalamyzda ötetın baiqauǧa eldıŋ är aimaǧynan 15 ümıtker keldı. Kelısımen bır-bırımen tanysyp, baǧdarlama boiynşa Astananyŋ eŋ tamaşa jerlerın aralap şyqty. Jyldaǧy dästürge jügınıp, stilist, şaştaraz jäne vizajisttermen kezdestı. Elordanyŋ üzdık şeberlerı olardyŋ alǧaşqy sahnalyq imidjderın qalyptastyru üşın belsendı türde jūmys jasady. Sol sätte ūiymdastyruşylar da jinalys ötkızıp, ümıtkerlerdıŋ ärqaisysymen şyǧarmaşylyq jūmys jasai bastady. Köp jyldar boiy baiqaudyŋ bas prodiusserı bolyp kele jatqan Mūrat Erǧaliev pen qoiuşy rejisser Aleksandr Ponomarev jas oryndauşylarǧa sahnada qalai jürıp-tūru kerektıgın tüsındıre otyryp, bärınıŋ repertuarlaryn tekserıp kördı. Būl joly öz keŋesterın berse, daiyndyq kezınde är qatysuşymen jeke jūmys ısteitındıkterın eskerttı.
Al, mausymnyŋ 5-ı künı «Duman» oiyn-sauyq ortalyǧynda jerebe tartu räsımı ötıp, är qatysuşy özınıŋ konserttegı rettık sanyn bıldı. Odan keiın, Astanada bolǧandaryn este qaldyru üşın «Jas qanat» alleiasyna jeke-jeke köşet otyrǧyzdy. Būl dästürdı ūstanudaǧy basty maqsat – keiın Astanada qonaqta bolǧanda nemese gastroldık saparlarmen kelgende, olar osy alleiadaǧy öz köşetınıŋ qalai öskenın köredı. Söitıp, bolaşaq öner joldarynyŋ qalai bastalǧanyn esterıne tüsıruı tiıs…
Jyl ötken saiyn «Jas qanatqa» qatysuǧa niet bıldıruşılerdıŋ qatary käsıbi daiyndyqtan ötken änşılermen tolyǧa tüskenın erekşe atap ötken jön. Būl – keleşekte baiqauǧa qatysuǧa tılek bıldıruşılerge qoiylatyn talap ta kürdelene beredı degen söz. Sondai-aq, ırıkteu deŋgeiı de bırte-bırte joǧarylai tüspek. Ereje boiynşa qatysuşylardyŋ ışınen är kezeŋ saiyn ūpaiy tömen 5 änşı şyǧyp qalyp otyrady. Būl tūrǧyda, «bızdıŋ zamanymyzda oryndau tehnikasyn jaqsy meŋgeru jäne keremet dauysqa ie bolu, ärine, jetkılıksız. Körermendı özıne tartyp, nazaryn audaru üşın sahnada sapaly ärı tartymdy öner körsetu kerek. Qazylar alqasy da jas oryndauşylardyŋ öz talantyn tolyǧyraq tanytuǧa septıgın tigızer. Bıraq, aldyn-ala eske salamyn, körermenderden jasaqtalǧan qazylardyŋ şeşımı käsıbi qazylar qoiǧan baǧalarǧa eş äser etpeidı. Olardyŋ közqarastary bır jerden şyǧa ma, joq pa, būl jaǧy da belgısız» dedı Mūrat Erǧaliev.
P.S. «Jas qanat» baiqauy jas änşılerdıŋ tūtas bır tolqynyn tärbielep, qazırgı qazaq estradasynyŋ tanymal ökılderınıŋ önerdegı jolyn aşty desek, qatelespeimız. Oǧan ūltyna, bılımı men tūrǧan jerıne qaramastan, 30 jasqa deiıngı kez kelgen tılek bıldıruşı qatysa alady. Endı mıne, keşegı künnen bastap 22-şı märte jastardyŋ baq synauyna mümkındık bergen şara bügın Astana tūrǧyndary men qonaqtaryn taǧy da quantpaqşy. Al, erteŋ ötetın soŋǧy synda olardy köptegen syilyqtar kütıp tūr.
Erkeǧali BEISENOV
Uyz lebız
Nazymgül BOLATHAN, Taldyqorǧan qalasy:
– Jalpy, men Astanaǧa üşınşı ret kelıp otyrmyn. Kelgen saiyn taŋqalarlyq sezımge bölenemın. Al, «Jas qanat» baiqauyna alǧaş qatysyp jatqandyqtan, respublikalyq jas änşıler saiysyna baratynymdy kenetten bıldım. Sol quanyşty sätte Peterburgte ötken saiysta jürgen edım. Ärıptesterım maǧan sättılık tıledı. Sol jalyndy lebızderı baiqau barysynda küş berıp, maǧan jeŋıs äkeledı degen oidamyn.
Aldiiar ERǦALİ, Kökşetau qalasy:
– Mūrat Erǧaliev aityp ketkendei, naǧyz ärtıs tek ändı oryndap qana qoimai, sonymen qatar, belgılı bır obraz qalyptastyra bıluı qajet. Äuendı jan-dünieŋdı sala otyryp oryndaǧan dūrys. Men köpşılık aldynda än aitqandy jaqsy köremın. Är änşıge körermen – eŋ basty faktor bolyp sanalady. Sondyqtan, sahnaǧa şyqqanda men bar önerımdı körsetuge tyrysamyn.
Ruslan İSMAIYLOV, Jezqazǧan qalasy:
– Būl – menıŋ ömırımdegı alǧaşqy kürdelı synaq. Qatty qobaljudamyn. Osy baiqauǧa jol sıltep, qoldau körsetken dosyma ärı prodiuserıme şeksız alǧys bıldıremın. Ol – 2009 jylǧy «Jas qanat» qatysuşysy Mahambet Qaratai degen azamat. Baiqauǧa bır-ekı aidai qyzu daiyndaldyq. «Tek qana alǧa!» degen ömırdegı ūranyma jügıne otyryp, Astanaǧa alǧaş ret kelıp otyrǧanyma quanyştymyn. Men oilaǧandai ǧajaiyp qala eken.
