ӨТІНІШ ЕСКЕРУСІЗ ҚАЛМАЙДЫ
«Нұр Отан» ХДП Астана қалалық филиалы Қоғамдық қабылдау бөлімінде жыл басынан бері 4843 азаматтың өтініші қабылданыпты. Оның ішіндегі 650 өтініш құзырлы органдарға қарастыруға жіберіліп, 4193 адамға құқықтық кеңестер берілген. Азаматтардың өтініштерін қарауда мемлекеттік орган өкілдерінің жауапкершілігін арттырып, нақты шешімдер қабылдауға мұрындық болып жүрген «Нұр Отан» ХДП Астана қалалық филиалы Қоғамдық қабылдау бөлімінің меңгерушісі Марал Елеуқұловамен әңгімелесіп, жұмыс барысына қанықтық.
– Қала тұрғындарын көбіне қандай мәселелер мазалайды?
– Азаматтарымыз қоғамдық қабылдауға тұрғын үймен қамтамасыз ету, жер телімдерін бөлу, жұмыспен қамту, ПИК қызметіне арыз-шағымдарын айтып, балаларын балабақшаға орналастыру, көліктік инфрақұрылымды дамыту, құжаттарды рәсімдеуге көмектесу, сот өкімдерінің орындалмауы, жекеменшік мекемелердің жалақыны бермеуі және тағы басқа да күнделікті тұрмыстың түйткілді мәселелерімен келіп жатады. Соңғы кездері атқарушы билік органдарының өкілдері қоғамдық қабылдауға қатысып, толассыз келіп жатқан арыз-өтініштерді қарастыруды дәстүрге айналдырды. Парламент Мәжілісінің депутаттарынан бастап, қала әкімінің орынбасарлары мен аудан әкімдеріне дейін біздің бастамамызға құлақ асып, осы шараның басы-қасында жүрді. Олардың азаматтарды қабылдау кестесі алдын ала бұқаралық ақпарат құралдарында жарияланып отырады.
– Қоғамдық қабылдау аясында құқық қорғау органдарының ашық есік күндерін ұйымдастырдыңыздар, оның ерекшелігі қандай?
– Қалалық прокуратура өткізген ашық есік күнінің нәтижесі бойынша халық көбінесе сот шешімінің орындалмауы, лауазымды тұлғалардың іс-әрекеті,
жалақының берілмеуі, жер телімдері үшін өтемақы төлеу сынды әділетсіздіктерге төрелік іздеп келетініне көз жеткіздік.
Сондай-ақ, «Юстиция кеңес береді» республикалық акциясы аясында Әділет департаменті мамандары жылжымайтын мүліктердің құжаттарын рәсімдеу, кәмелетке толмағандардың құқықтары, асыраушысынан айрылған жағдайда анықтама алу тәртіптері туралы кеңестер берді.
Әрине, қабылдауға арызымен келген адам нақты көмек алады. Мысалы, «Вектор» ЖШС жұмысшылары атынан күзетші В.Н.Шандраковтың жалақысын ала алмай жүргендігі туралы арызы қаралды. Нәтижесінде, аталған мекеменің заң бұзғаны анықталып, жұмысшыларының жалақысы толығымен төленуіне сеп болдық.
Б.Сәрсеннің жер телімі үшін өтемақы төленбегендігі туралы шағымы қаралды. Партия тарапынан оның жер телімі дұрыс бағалануы мен өтемақы төленуі әділ шешілуін қамтамасыз еттік.
– Көпшілікті баспана мәселесі мазалайтыны белгілі. Бұл да нұротандықтардың назарынан тыс қалмаған болар?
– Астана қаласының Тұрғын үй басқармасымен бірлесіп, тұрғындарға мемлекеттік тұрғын үй құрылысы бағдарламасын түсіндіру бойынша жұмыстар жүргізілді. Қалалық филиалдың қабылдау бөліміне басқарма басшылары келіп, азаматтарға ҚР «Тұрғын үй қатынастары туралы» заңы, «Қолжетімді баспана» мемлекеттік бағдарламасы туралы мағлұмат берді.
Биыл 11 шілдеде «Қолжетімді баспана» бағдарламасын жүзеге асыру бойынша «Тұрғын үй құрылыс жинақ банкі» акционерлік қоғамы «бірегей кеңес беру күнін» өткізді.
Мұндай сұхбат алаңын құру арқылы «Нұр Отан» ХДП қала тұрғындарына халықты баспанамен қамтамасыз етудегі мәселелерді талқылауға мүмкіндік береді.
Әлеуметтік бағыттағы шаралар Жұмыспен қамту және әлеуметтік бағдарламалар басқармасымен бірлесе ұйымдастырылуда. Мәселен, «Жұмыспен қамту – 2020» бағдарламасын жүзеге асыру бойынша тұрақты түрде өткізілетін ашық есік күндері, бос жұмыс орындары жәрмеңкесі. 28 наурызда Жұмыспен қамту орталығында көшпелі қоғамдық қабылдау өткізілді. Оған қаланың ірі кәсіпорындары – «КСС-Астана» ЖШС, «АБК-Максат» ЖШС, «Апрель» ЖШС, «СК Строй Класс» ЖШС, «BI Group» ЖШС-ның жауапты қызметкерлері тартылды. Осы жолы 74 азаматтың өтініші қабылданды. Оның ішінде 15 адам бос орындар жәрмеңкесінен жұмысқа орналасуға жолдама алып, 6 адам «қоғамдық жұмыстарға» жіберілді. 7 адам «BI Group» ЖШС-нен тегін кадрларды қайта даярлау курсынан өтетін болды.
Мұндай акциялар ықтимал әлеуметтік шиеленістердің алдын алуға, жұмыссыздық деңгейін төмендетуге, қордаланған бірқатар мәселелерді тиімді шешуге, заңнамалық тұрғыда реттеуді қажет ететін құқықтық қатынастарды анықтауға, азаматтардың білдірген өтініштерін бақылауда ұстауға септігін тигізеді.
Жалпы, қоғамдық қабылдауды ұйымдастыру – халықпен байланысты нығайтудың тиімді жолы және қатысушы әрбір азамат құқығының сақталуына партияның көңіл бөлетіндігін дәлелдейді. Ал партия ұйымының басты міндеті атқарушы биліктің назарын дәл осы мәселелерді шешуге жұмылдыру болмақ.
Айгүл УАЙСОВА