Астана аспанында ән болып қалықтап, Есілдің жағасында би болып бұралып, елорда төрінде күй күмбірлеткен «Шабыт» шығармашыл жастар фестивалі бұрнағы күні мәресіне жетті. Он бесінші мәрте ұйымдастырылған биылғы байрақты бәсекеде ең басты жүлде – Қазақстан Президентінің кубогын цирк өнерінің шебері Мұхтар Өселбаев қанжығалады. Оған Астана қаласының әкімі Иманғали Тасмағамбетовтің ықылас гүлі салтанатты жағдайда тапсырылды.
«Шабытқа» он бір елден қатысқан 500-ге тарта үміткер «Классикалық музыка», «Журналистика», «Бейнелеу өнері», «Халық музыкасы», «Цирк өнері», «Балеттің жас әртістері байқауы» және «Үздік әдеби шығарма» аталымдары бойынша бақтарын сынады. Қатысушылардың қарымын он мемлекеттен шақырылған өнер майталмандары сарапқа салуға атсалысты. Өнер өрендерінің кеудесіне үміт отын тұтандырып, шығармашылығына серпіліс берген халықаралық дода осыған дейінгі тарихында 14 мыңға тарта шығармашыл жастың жігерін жанып, жарқын таланттарын танытуларына мүмкіндік берген екен. Бас шаһарда мәдениет пен өнер зиялыларының шоғырын қалыптастырды.
Фестивальдің соңғы күнінде «Шабыттың» шыңын бағындырған жеңімпаздар марапатталды. Қылқалам иелерінің арасында Тоғжан Табысбек топ жарды. Тоғжанның қиялынан туған «Көшпенділер» топтамасы көрермен тарапынан да зор қошеметке ие болды. Ал цирк өнерінің жас майталманы Мұхтар Өселбаев байқаудың бас жүлдесімен қатар, Президенттік кубоктың иегері атанды. Әйгерім Бекетаеваның есімі шоқтығы биік жас балет әртісі ретінде марапатталса, Дарья Киселева фортепиано жанры бойынша гран-приге ие болды. Вокалдан Азат Мәлік бас жүлдені алды, скрипка аталымының биігі Ахан Мейірбековке бұйырды. Александра Рамазанова классикалық музыка жанры бойынша үздік деп танылды. Әдебиет аталымында Балтабек Нұрғалиевтің бағы жанды. Ал әріптестеріміздің арасынан Рахат Жақсыбайдың шығармасы озық шықты.
Салтанатты басқосуда көрермен жүлдегерлердің өнерін тамашалады.
Асхат РАЙҚҰЛ
