Таразидың тартымды әңгімесі
Қазақ Ұлттық өнер университетінде осы оқу орнының профессоры, белгілі жазушы-драматург Әкім Таразидың шығармашылық кездесуі өтті.
Шараға қаламгердің әріптестері, университет оқытушылары, студенттер және өзге де оқырмандар келіп қатысты. Онымен оқу орнында бірге қызмет атқаратын белгілі театртанушы Әшірбек Сығай, кинотанушы Нәзира Мұқышева және көрнекті ғалым Мырзатай Жолдасбеков жазушының шығармашылығына тұшымды пікір білдіріп, жеткен жетістіктері хақында біраз ойларын ортаға салды.
Арасында Әкім Таразидың өткенінен бүгініне дейінгі өрісті өмір жолына шолу жасаған көріністер қойылып, сондай-ақ, оның «Бұлтқа салған ұясын» атты романының басты кейіпкері Омардың басынан кешкен оқиғалары сәтті кейіптелді. Университет студенттері аталған романнан үзінділер оқыды. Одан соң жазушының «Жақсы кісі» пьесасы мен өзі сценарийін жазған «Арман – атаман», «Қараш-қараш», «Мұстафа Шоқай» фильмдерінен эпизодтар көрсетіліп, жиналғандар назарына «Тас жарып шыққан шығарма» атты қысқа метражды картинасын тамашалады.
Университет ректоры Айман Мұсақожаева қаламгерге шығармашылық табыс тілесе, өз кезегінде Әкім Тарази да кешті ұйымдастырушыларға шексіз ризашылығын білдірді.
Е.БОЛАТҰЛЫ