Тәуелсіз болу дегеніміз – ұлы ұғым. Тәуелсіз елдің ең басты тұғыры – ол қоғамның, сол мемлекеттегі жергілікті ұлттың рухы, жігері, қоғамдық санасы.
Қазақстанның бүгінгі таңдағы тәуелсіздігінің құдіретті күші ұлттар достастығы, ел бірлігі және Елбасымыздың салиқалы саясатында жатыр.
Мемлекетіміз осындай аз ғана уақыт ішінде көптеген ірі экономикалық, саяси және әлеуметтік жетістіктерге қол жеткізді. Еліміздің аяғынан нық тұруы, ұлттық қауіпсіздікті қамтамасыз етуі және экономикамыздың жедел қарқынмен дамуы – негізгі стратегиялық бағыттардың жүзеге асырылуында.
Осы орайда, халыққа Жолдауында Қазақстан Президенті Нұрсұлтан Назарбаев тәуелсіз мемлекет атанғанымыздың 25 жылдығына аяқ басқалы тұрғанымызды айта келіп: «Бұл – тәуелсіздікті нығайту жолындағы өлшеусіз еңбегіміздің ширек ғасырлық белесін қорытындылайтын мерейлі сәт. Тәуелсіздікті баянды ету оған қол жеткізуден де қиын. Мемлекеттігіміздің тұғырын мызғымастай нығайта түсу үшін бізге әлі талай өткелі күрделі, өкпегі көп бұралаң жолдардан өтуге тура келеді» деп алдағы кезеңде кездесетін сын-қатерлерден мүдірмей өтуге шақырды.
Қазіргі таңда еліміздің кез келген азаматы тәуелсіздіктің қадірін жете түсінді. Ешкімге тәуелді болмау, өз мемлекетің, туың, Елтаңбаң болу – үлкен бақыт. Ендігі мақсатымыз – жас мемлекетіміздің дамуына үлес қосу. Алдымызда әлі талай асулар жатыр. Әсіресе, абыройымызды әлемге асқақтататын жаһандық ЭКСПО көрмесіне үлкен дайындықпен келуіміз керек. Оның жоғары деңгейде өтуіне әрқайсысымыз атсалысуға тиіспіз.
Мемлекетіміздің болашақ өркендеуі, дамуы, гүлденуі, иманды, білімді, оның ішінде мемлекеттік тілді жақсы меңгерген, барлық халықтың дәстүрін құрметтейтін жігерлі жастарға байланысты. Ата-бабаларымыздың арманын ақтап, тәуелсіздігімізді асқақта берейік, ағайын!
Г.МОЛДАБЕКОВА,
Әскери соттардың қызметін
қамтамасыз ету бөлімінің
бас маманы
