ҮЗДІК КӘСІПКЕРЛЕР АНЫҚТАЛДЫ
Кеше Ұлттық сурет галереясында өз саласында жоғары жетістіктерге жеткен кәсіпкерлер марапатталды.
«Шағын және орта кәсіпкерлікті дамыту саласындағы жетістігі үшін» байқауы 2006 жылдан бері дәстүрлі түрде өткізіліп келеді. Бұл мәртебелі шара ғана емес, бизнес жетістігін таныстыруға, тәжірибе алмасуға, серіктес іздеуге және жаңа шарттар жасасуға арналған бірден-бір алаң болып табылады. Сонымен бірге, бұл – кәсібін нәсіп еткен жандарды ынталандыратын сайыс. Осы байқау арқылы жеңімпаздар өзінің мақсатты аудиториясын кеңейтіп, сарапшылар кеңесін алып, жаңа мүмкіндіктерге қол жеткізе алады.
Сонымен биыл да үш номинация бойынша өткен байқаудың «Қызмет көрсету саласындағы үздік кәсіпкер» аталымы бойынша «Алтын адам» мейрамханасы жеңімпаз болды. «Жылдың үздік кәсіпкері» ретінде «Астана наны» ЖШС танылса, «Өндіріс саласындағы үздік кәсіпкер» аталымында «АЛКОН+» ЖШС бірінші орынды иеленді.
Қымбат НҰРҒАЛИ