Жанға шипалы «Шарапат»
Астана қаласы әкімдігінің шешімімен 2016 жылдың 9 қарашасында «Шарапат» әлеуметтік қызмет көрсету орталығы» болып өзгертілген мекеменің іргетасы 1989 жылы Целиноград облыстық Халық депутаттары кеңесі атқару комитетінің шешімімен «Целиноград облысы соғыс және еңбек ардагерлеріне арналған интернат үйі» болып құрылған еді.
Осы мекемені 14 жылдан бері тәжірибелі маман Кенжеболат Бәпішев басқарып келеді. Мекемеде тұрғындардың тұрмыс жағдайларын жақсартуға байланысты ауқымды істер атқарылып отыр.
Мекеме өз қызметін «Арнаулы әлеуметтік қызметтің кепілденген көлем тізімі» негізінде және «Стационар жағдайында халықты әлеуметтік қорғау шеңберінде арнаулы қызмет көрсету стандарттарына» сәйкес жүзеге асырады. Стационар жағдайындағы ақылы келісімшарт негізінде қарттар мен мүмкіндігі шектеулі жақын туыстары бар, бірақ қиын жағдайға душар болған адамдарға арнаулы әлеуметтік қызмет көрсетеді.
2017 жылы арнаулы әлеуметтік қызмет көрсетудің жаңа түрлері енгізілді: ақылы негізде мұқтаж тұрғындар үшін күндізгі жартылай стационар ашылды.
Бүгінгі таңда мекемеде Жұмыспен қамту, еңбек және әлеуметтік қорғау басқармасының жолдауымен 321 қызмет алушы тұрады, оның ішінде күндізгі қызмет көрсету бөлімінде – тоғыз, екі Ұлы Отан соғысының ардагері, он бір Ұлы Отан соғысы ардагеріне теңестірілгендер, жиырма жеті тыл еңбеккері, төрт қуғын-сүргін құрбаны, І топтағы мүгедектер – 65, ІІ топтағы 71 адам бар. Қызмет алушылардың жасы 24 жастан бастап 98 жасты құрайды.
Мекеме ғимараты 5 блоктан тұрады, олардың 4-еуі – тұрғынжай, бесіншісі – әкімшілік, сондай-ақ асхана, кір жуатын бөлме, монша-бассейн, рәсімдік үй, жеке жылыту қазандығы, автогараж бар. Жарық және жайлы бөлмелер – 1 және 2 орындық. Әр бөлмеде әжетхана, душ, лоджия, теледидар, тоңазытқыш бар, үй іші жағдайына жақындатылған жағдай жасалған. Арбадағы мүгедектер үшін қол тірек құралдары жабдықталған – қосымша техникалық құралдар, қозғалу қызметі бұзылған мүгедектер үшін лифтілер мен пандустар қарастырылған. Керекті мұқаммалмен жабдықталған әлеуметтік-тұрмыстық бөлмелер жұмыс істейді – мұнда электр плитасы, теледидар, ас үй гарнитуры, ыдыс-аяқ баршылық. Бұл бөлмелерде телефон орнатылған, қызмет алушылар кез келген кезде туыс-жақындарымен хабарласа алады және керек жағдайда ішкі байланысты пайдаланады.
Қазіргі мекеменің құрылымы әлеуметтік-тұрмыстық және медициналық қызмет көрсетуге, әлеуметтік-оңалту іс-шараларын кешенді түрде жүзеге асыруға мүмкіндік береді.
Әлеуметтік-медициналық көмек амбулаторлық-емханалық көлемінде заманауи аппаратурамен жабдықталған.
2011 жылдан бастап қарсы көрсеткіштері жоқ барлық тілек білдіргендер үшін бассейнде жүзу сабақтары енгізілді. Мүгедектерді оңалту жоспарына «Тұлпар» ат-спорт кешенінде жүргізілетін иппотерапия сабақтары енгізілген.
Әлеуметтік-психологиялық қызмет көрсету және психоэмоционалдық тұрақтылықты қолдау мен релаксация мақсатында сенсорлық бөлме, құм және ионотерапия бөлмелері жұмыс істейді. Қазақстандағы әлеуметтік салада 2004 жылы мұнда алғашқы педагог-психолог мамандығы енгізілді.
Қызмет алушылар қатысатын «Халықтың қолданбалы шығармашылығы», «Шебер қолдар», «Көркем сурет салу» үйірмелері, тігін цехы жұмыс істейді. Дәрігердің қорытындысы бойынша қызмет алушылар тігін цехында, аяқ киім жөндеу шеберханасында толық емес жұмыс күні тәртібінде еңбек етеді.
Тұрмыстық-мәдени іс-шаралар өткізу үшін 250 орындық онлайн режимінде фильмдерді көруге арналған, сандық кинопроектормен жабдықталған кинозал бар, әдеби қорда 6 мыңнан астам кітабы бар кітапхана және «тірі жандылар бұрышы» – аквариум бар. Спорттық клуб өз жұмысын жасайды, мұнда шахмат үстелі, теннис үстелі және бильярд бар.
Әртүрлі бағыттар бойынша ынтымақтастық туралы мекеме мен оқу орындары арасындағы меморандумдарға қол қойылған. 2009 жылдан бастап «Нұр Отан» партиясының бастауыш ұйымы құрылып, 55 адам партия құрамына мүше болды. Шаралар кешені «Ардагерлерді ардақтайық» партиялық жобасы аясында өтеді.
2017 жылдың 1 тамызында егде жастағы адамдар мен І, ІІ топтағы мүгедектерге арналған күндізгі қызмет көрсету бөлімі ашылды. Әлеуметтік саланы модернизациялау мақсатында Астана қаласының Жұмыспен қамту, еңбек, әлеуметтік қорғау басқармасы 2017 жылдың 14 тамызында екі ведомстволық мекемелермен бірігіп, яғни Астана қаласы әкімдігінің «Шарапат» әлеуметтік қызмет көрсету орталығы және «Әлеуметтік қызмет көрсету орталығы» МКҚК қала тұрғындарына арналған реабилитациялық бөлім ашылды, салалық мамандар және дәрігерлердің қарауынан кейін «Әлеуметтік қызмет көрсету орталығы» МКҚК қызмет алушылары жыл ішінде мынадай процедуралармен қамтылады: массаж, ЛФК, гидротерапия, физиотерапия, сонымен қатар сенсорлық бөлме, құм терапиясы, мәдени іс-шараларды және спорт шараларына қатыса алады.
Ұжымның басты және негізгі мақсаты астананың мұқтаж азаматтарына сапалы арнаулы әлеуметтік қызмет көрсету болып табылады.
Еркін ДӘУЕШҰЛЫ, Қазақстан журналистер одағының мүшесі