«Еліңнің ұлы болсаң, еліңе жаның ашыса, азаматтық намысың болса, қазақтың ұлттық жалғыз мемлекетінің нығайып-көркеюі жолында жан теріңді сығып жүріп еңбек ет. Жердің де, елдің де иесі өзің екеніңді ұмытпа!».
Бір қаламның ұшымен жазылып, барша қауымның жүрегіне орнаған, бір ауыздан айтылып, кең өлкемді шарлаған Елбасының осынау бір сөзі қай уақытта да қан тамырымыздың бүлкіліндей естіледі бізге. Иә, бұл – бүкіл қазақ жұртының, дүйім елдің қызу құштарлықпен, сарқылмас сүйіспеншілікпен айтар, ардақ тұтар асыл лебізі. Елдік туымыз тігілген үлкен үйіміз, алтын шаңырағымыз да осында. Жарастығымыздың да, жақсылығымыздың да, тыныштығымыздың да қиясы, махаббатымыздың ұясы да – Қазақстан.
2016 жыл – Қазақстан Республикасының өз Тәуелсіздігін жариялағанына 25 жыл толатын, ел өміріндегі айшықты жыл. Осы өткен ширек ғасыр уақыт – тарихи дамудың үлкен сатысынан өткен қазақстандықтар Тәуелсіз еліміздің Тұңғыш Президенті, Ұлт көшбасшысы Нұрсұлтан Назарбаевтың басшылығымен әлеуетті де өркениетті мемлекет құру жолында білек біріктіре еңбек еткен кезең. Халқының мызғымас тұтастығы мен рухының мықтылығы арқасында адам сенгісіз жоғары экономикалық даму мен азаматтық келісімге қол жеткізген еліміз мемлекеттік құрылыстың сапалы жаңа кезеңіне қадам басты. Болашақтың бағдарын белгілеген басым бағыттар Мемлекет басшысы ұсынған бес институционалдық реформада айқын көрініс тапты. Ал әлемнің барынша дамыған 30 елінің қатарына ену үшін бірыңғай болашақ ұлт қалыптастыруды көздеген жалпыұлттық «Мәңгілік ел» патриоттық идеясы Ұлт жоспарының негізі болып қаланды.
Осынау мемлекет пен қоғамда орын алып отырған барлық саяси-экономикалық, әлеуметтік реформалардың бәрі 1995 жылы қабылданған негізгі заң – Қазақстан Республикасы Конституциясының қағидалары негізінде жүзеге асып жатты. Тұтастай алғанда, тәуелсіздік жылдарында елдің заң шығарушы органы 2000-нан аса заң қабылдады, оның 90 пайыздан астамын қазіргі қос палаталы Парламент қабылдады. Қабылданған заңдар мемлекетіміздің тұрақты және орнықты дамуының берік құқықтық тұғырнамасына айналды.
Ел егемендігін алған сәттен бастап мемлекет дамуына бағытталған реформалардың өз деңгейінде жүзеге асырылуын жіті қадағалап, заңдық негіздерін бақылауда ұстаған, тәуелсіздіктің басты жетістігі және берік іргетасы – ішкі тұрақтылықты көздің қарашығындай сақтап, жас мемлекетіміздің аяғынан нық тұруына, әлемнің алпауыт елдерімен терезе теңестіруіне тәуелсіздікпен бірге қайта құрылған соттың да қосқан үлесі ұлан-ғайыр. Тәуелсіздіктің арқасында қоғамдық-саяси өмірде, экономикада түбегейлі реформалар жасалды.
1991 жылы қабылданған «Қазақстан Республикасының мемлекеттік тәуелсіздігі туралы» Конституциялық заң жаңа дербес мемлекеттің қалыптасуына жол ашты. Әлеуметтік бағдарланған демократиялық және құқықтық мемлекет құруға бағытталған жоспарлы саяси, экономикалық және басқа да қайта құрулар қоғамның заңдық саласын реформалау қажеттілігіне алып келді. Елде орын алған өзгерістер қоғамның ең басты құндылығы ретінде адамды, адам өмірін алдыңғы қатарға шығарды.
Бүгінде азаматтардың конституциялық құқықтары мен бостандықтарын қорғау, мемлекеттік-құқықтық құрылымдардың тұрақты жұмыс істеуі үшін қажетті жағдайларды құру, ішкі саяси тұрақтылық пен қоғам бірлігін сақтау мәселелері ерекше мәнге ие.
С.ЖҰМАҒАЛИЕВ,
Ақмола гарнизоны әскери сотының жетекші маманы
