26 қараша күні «Ұлы Дала елі – Тәуелсіздіктің 25 негізі» 25 жұлдызды күн жоспарын жүзеге асыру барысында «Қырғызстан-Астана» этномәдени бірлестігінде «Ассамблея тарихы – ел тарихы – халық тарихы» тақырыбында дөңгелек үстел өтті.
Іс-шараның негізгі мақсаты көп этностық мемлекет жағдайында ұлттық құндылықтарды ұлықтауға, этносаралық бірегейлікті насихаттауға, бейбітшілікті, бірлік пен келісімді сақтауға негізделді.
Елордалық Қазақстан халқы Ассамблеясы ұйымдастырған шараға ҚХА Ғылыми-сарапшылық тобы, этномәдени бірлестіктердің өкілдері, ҚХА мүшелері қатысты.
Дөңгелек үстел барысында Қазақстан халқының бірлігі мен келісімін нығайтудағы Қазақстан халқы Ассамблеясының рөлі, жас ұрпақты патриоттыққа және рухани-адамгершілікке тәрбиелеудің өзекті мәселелері, Қазақстандағы титулдық емес этностардың әлеуметтік-мәдени дамуы, Қазақстан Республикасы мен Қазақстан халқы Ассамблеясы дамуының тарихи параллельдері талқыланды.
«Біздің мемлекетіміз өз дамуының кемеліне жетті және өзін тәуелсіздіктің 25 жылын арқалаған, толыққанды қалыптасқан мемлекет ретінде айта алады. Ал біз әлем таныған Қазақстанның жетістіктерінде Ассамблеяның да үлесі бар екенін мақтанышпен және толық сеніммен айта аламыз» деп, мәжілісті ашқан елордалық ҚХА хатшысының меңгерушісі Л.Құсайынова қазіргі Қазақстанның қалыптасуындағы Ассамблеяның маңызына тоқталып өтті.
Астана қаласы ҚХА Қоғамдық келісім кеңесінің мүшесі Т.Кошман көп ұлтты мемлекет жағдайындағы бірегейлікті сақтау үшін жас ұрпақты этномәдени бірлестіктердің қызметі салаларына тарту қажеттілігіне баса назар аударып: «Қазақстан халқы Ассамблеясын белсенді, өмірге құштар, өздерін қазақстандықтар ретінде сәйкестендіретін жастармен толықтыру үшін оларға Ассамблея қызметін танытуға мүмкіндік беретін ғылыми негізде жағдайлар жасалу керек» деді.
Өз кезегінде сөз алған Астана қаласы өзбек этномәдени орталығының төрағасы Ш.Пулатов Н.Назарбаевтың моделі және оны жүзеге асырудағы өзбек этномәдени бірлестігінің рөлі жөнінде, сонымен қатар мемлекеттік тілді барлық этностарды біріктіретін құрал ретінде атап, оны білу қажеттілігінің маңызына ерекше көңіл бөлді.
Мәжілісті қорытындылаған Астана қаласы Қазақстан халқы Ассамб-леясы хатшысының меңгерушісі Л.Құсайынова қатысушыларға алғыс айтып, айтулы мереке – Қазақстан Республикасы Тәуелсіздігінің 25 жылдығы қарсаңында өткізілген осы іс-шараның маңызы мен салмағын атап өтті.
