Астананың 20 жылдық мерейтойына орай Ақжайық өңірі гүлзар мен Кеңес Одағының батыры Мәншүк Мәметова ескерткішін тарту етеді.
Кеше Орталық коммуникациялар қызметі алаңында Елбасының «Болашаққа бағдар: Рухани жаңғыру» бағдарламалық мақаласы аясында атқарылған істер туралы есеп берген БҚО әкімі А.Көлгінов осылай деп мәлімдеді. Жоспар бойынша, желегі майысқан саябақ Жеңіс пен Бөгенбай батыр даңғылдарының қиылысында, бұрынғы сүріліп тасталған үйлердің орнындағы 1,5 га аумақта орналаспақ. Ал саябақ ішінде қайсар қыз Мәншүк Мәметованың ескерткіші қасқайып тұрады.
– Елдің басқа аймақтары елордаға қарап бой түзейді. Астананың қала шаруашылығындағы оң үрдіс, таңсық тәжірибелерінен там-тұмдап игеріп, облыс орталығы Оралда қолданып жатырмыз, – деп атап өтті өз сөзінде А.Сейдірұлы. Мәселен, былтыр қалалық әкімдік жанынан «Smart Uralsk» халыққа қызмет көрсету орталығы ашылды. Тұрғындар ол жерде 618 түрлі мемлекеттік қызметке жүгіне алады. Сондай-ақ, «Smart City» бағдарламасы аясында 30 жоба жүзеге асып жатыр. Олардың қатарында «Қауіпсіз қала», «Ашық әкімдік», «e-KCK», құрылыс саласындағы BIM-технологиясы, балабақшаға электронды кезек, смс арқылы жолақы төлеу жүйелері уақыт үнемдеп, адам факторын азайтуға айтарлықтай ықпал етеді.
Әділбек ЖАПАҚ
